ORANJESTAD (AAN): Minister di Enseñanza y Deporte, señor Endy Croes, den conferencia di prensa di gobierno, Diahuebs, el a elabora tocante e Weganan WE Aruba, esta ‘Weganan Escolar”.
E mandatario a trece dilanti cu, manera tur hende sa, Aruba ta pasando den diferente reto pero den e conferencia di prensa aki, el a bin pa trece e aspectonan bunita y alegre cu ta proyectonan cu ta inspira e alumnonan di scol, y ta duna atencion necesario na deporte escolar.
Pesey, e dignatario a presenta oficialmente, hunto cu señor Edgar Erasmus di IBiSA, ken mas dilanti a amplia e informacion.
Croes a agrega cu e ta hopi gradici cu IBiSA, pa e trabao cu desde inicio nan ta haci riba veld. Nan ta bezig for di cuminzamento di aña cu henter e proyecto aki. “Nos a pone un vision nos dilanti, unda nos kier bay y den combinacion cu IBiSA nos ta carga e proyecto aki”, el a bisa.
El a referi na e lanzamento di WE Aruba cu gobierno a lanza un luna pasa, loke kiermen Weganan Escolar Aruba, y el a recorda e Olimpiada Escolar Betico Croes, cu te aña 2009 ainda tabata tuma lugar. “Awo e ta den un bachi nobo y sigur un trabao hopi bunita” Croes a indica.
E mandatario a pidi henter pueblo di Aruba, mayornan y muchanan pa sostene e weganan aki, y a anuncia cu Diabierna otro siman, esta dia 17 di Juni na e gran apertura oficial di e WE Weganan Escolar.
El a menciona cu scolnan a clasifica den ocho diferente deporte, di cualnan el a menciona Volleyball, Basketball, Futbol, Beach Tennis, Dance Sport, Atletismo, entre otro.
Na e inicio y ciere di e campeonato aki ocho scol den cada deporte ta yega e Weganan Escolar WE Aruba. E apertura ta bay ta hopi bunita.
Refiriendo na e mascota cu ta identifica e weganan escolar. E aña aki ta un prikichi cu ta carga e nomber WEWE. E mascota lo cambia cada aña, e dignatario a indica.
El a comenta cu WEWE a bishita Prinses Amalia Scol y e alumnonan tabata sumamente contento ora e mascota a yega.
