Musica di Rincon Boys cu Azucar Band y Galloway...
ORANJESTAD (AAN): E ta algo cu tin algun tempo caba den preparacion, y Diabierna awor for di anochi trempan, lo bay tin un Feria cu fabuloso musica na Colegio Nigel Matthew na San Nicolas.
E Feria aki ta un evento pa recauda fondo pa e 80 alumnonan di Colegio Nigel Matthew cu ta rumbo pa Canada riba Diaranson 3 di April venidero. E ta forma parti di e proyecto di viahe cu yama “CNM goes to Canada 2024”.
DIARIO a nota cu e Feria Cultural aki lo start for di 6:00 pm y sigui te cu 11:00 pm, y lo bay tin animacion musical fenomenal cu e.o. Rincon Boyz, Robert Maduro & Azucar Band, Massive Brassband, Galloway, Queen Ivy, . E bandanan aki sigur lo bay ponebo move.
Ademas di e grupo musical, lo por mira show di grupo di baile di scol mes. Tambe lo tin declamacion di poesia, cantamento, y mas.
Den e Feria Cultural aki, lo bay tin tentnan di cuminda, artesania, cos dushi, weganan popular, y mas.
A ser splica na DIARIO, cu un grupo di alumno di CKV a dicidi na crea un obra teatral. Y e anochi aki nan lo bay duna su presentacion.
Segun e grupo CKV Stars, e obra teatral yama ‘Greetings from Aruba’ y sigur lo cay na agrado di tur hende na e Feria aki.
