Glenda Zavala di BNA ta informa:
ORANJESTAD (AAN) — Biblioteca Nacional na Oranjestad, ta organizando Diabierna 11 di Augustus awo, un “Back to School Fest” combina cu Kerenkentenchi, y un programa masha bunita mes, cuminzando pa 6’or di atardi te 8’or di anochi.
Asina Glenda Zavala, encarga cu actividadnan na BNA, a relata den entrevista cu DIARIO. E actividadnan ta consisti di contamento di storia, grupo di baile, show di magia, payaso loco loco, show di canto, y hopi mas.
E festival aki ta pa e muchanan refresca nan mente, y asina por cuminza un aña escolar contento. “Esaki ta e regalo cu nos kier duna e muchanan pa finaliza e vacacion, y mi ta kere cu nos ta bay haya hopi mucha e dia ey, pasobra ya mayornan a cuminza yama nos, y nan ta hopi interesa den e actividad aki”, Glenda Zavala a menciona.
El a agrega cu e biaha aki no ta tuma inscripcion. Nan a caba cu un actividad di buki di pret unda nan tabata tin como 60 mucha; e tabata un siman largo unda e muchanan a siña con pa conta storia, traha nan mesun storia, traha popchi pa poppenkast. Y tabata tin como invitado e autor Desiree Correa, cu a duna un show di poppenkast pa e muchanan.
Zavala a indica cu aña pasa e “Back to School Fest” a tuma lugar na BNA San Nicolas, y e aña aki ta un regalo pa e muchanan di pabao.
E actividad aki lo tuma lugar patras den e Podium di Biblioteca y nan ta trahando hopi duro, pa asina brinda e muchanan un bunita actividad.
