Cu Ley den man DIARIO lo sigui cuestiona turbulencia den Parlamento
*Ministerio Publico tin autoridad propio pa rechaza metemente politico
*Kamperveen ta causa di morto prematuro di Gabinete Wever-Croes 2
ORANJESTAD(AAN)—Pa Gobernacion por ta posibel ta yega na coalicion cu hopi biaha ta mishi tambe cu e principio democratico, cu realmente ta dicta cu ta e partido cu haya mas voto ta e partido cu ta den Gobierno.
Ya cu mayoria den Gobierno ta depende naturalmente di e cantidad di votonan, partidonan grandi, cu a conoce e sosten real mayoritario di Pueblo, mester uni den un coalicion cu mester tene cuenta cu e boluntad di Pueblo y mester di un programa di gobernacion, cu ta acuerdo na cual ambos partido ta tene na mes.
Den caso di Raiz, continuamente por tuma nota di e rechazo publico cu Pueblo di Aruba na ultimo eleccion a duna MEP e mayoria di voto pa goberna Aruba.
Continuamente por tuma nota di expresionnan di miembronan di partido Raiz, cu ta bay contra e volumen di Voz di Pueblo cu ta e factor determinante di democracia.
E acuerdo di gobernacion ta base di gobernacion democratico cu ta exigi cu ta respet di politiconan cu ta mara nan mes na un acuerdo.
Den historia politico di Aruba por nota demasiado bez, con partidonan chikito cu no a haya e confianza real di Pueblo y ta tene na un partido mas grandi pa nan ta parti di gobernacion ta destrui logronan importante pa e pais.
No ta DIARIO pero Reino Hulandes y organisacionnan mundial ta aplaudi e logro cu a wordo alcansa dor di Aruba na man di dos Gobierno Evelyn Wever-Croes, cu a haya e confianza di Pueblo.
DIARIO cu tin contacto continuo cu Pueblo ta na haltura di e sosten historico cu Gobierno Evelyn Wever-Croes tin na Aruba tambe y a adverti pa loke por socede y a socede ora Raiz a kibra e acuerdo di gobernacion y a nombra Raymond Kamperveen como Presidente di Parlamento cu partidonan di oposicion.
Pues por considera Raymond Kamperveen den su funcion como Presidente di Parlamento como e “corpus delicti”e motibo di problema den e gobernacion actual.
Aruba, cu manera Reino mes ta bisa mester di continuacion di su maneho riba tur tereno, ta wordo ranca for di su trankilidad y den Parlamento suspenso y mas suspenso ta wordo crea den un mundo politico caminda stabilidad di partidonan actual den Parlamento ta un pregunta grandi.
Asina ta conoci cu Geoffrey Wever, cu a keda Ministro pa Raiz, ta parti di e partido Futuro di Gerlien Croes pa eleccion na December.
Den e funcion aki por nota diariamente con Geoffrey Wever como miembro di e Gobierno Wever-Croes, ta presenta su mes como Ministro y ta presenta plannan na diferente occasion na Pueblo.
Awor e plannan cu e ta presenta como parti di Gabinete Wever-Croes, ta plannan cu e lo hiba su partido nobo Futuro? Ora e papia di e maneho cu ta wordo hiba y lo sigui den futuro, e ta papia pa Gabinete Wever-Croes y pa e partido Futuro di cual oficialmente e ta forma parti?
Riba fiesta di Sinterklaas eleccion lo tuma lugar. Pero esaki no ta nifica cu na e momentonan ey gobernantenan ta bay cas. Mester forma un Gobierno nobo.
Awor si Geoffrey Wever ainda kier keda Ministro, tin chens cu e no por ta Ministro di Raiz pero e ta e ora Ministro di Futuro, cu cual MEP cu ta e partido mas grandi, no tin ningun acuerdo di gobernacion.
Con despues di eleccion, Geoffrey Wever por sigui representa Raiz si e wordo eligi hasta como Miembro di Parlamento di Futuro?
Raiz ta den un problema serio awor y mester midi su palabranan den publicidad.
Cu DIARIO tin razon a base di informantenan pisa cu DIARIO tin rond Aruba pa bisa cu un escenario ta wordo prepara pa hinca Prome Ministro Wever-Croes den un situacion fastioso, cu por conduci na retiro como Prome Ministro, ta basa riba realidad.
Chistoso ta, cu segun informantenan, Kamperveen mes ta splica cu e por cambia e “bijeenkomst”pues e reunion cu no ta reunion oficial di Parlamento den un reunion oficial cu si por pasa un fastball pa manda deshaci di confianza den Prome Ministro Evelyn Wever-Croes pasobra e lo a mete den asunto di Ministerio Publico.
Un situacion cu ta causa risa, pasobra si Prome Ministro Evelyn Wever-Croes mete den asuntonan di Ministerio Publico, e ta core riesgo cu e mester contesta pasonan cu Ley ta crea pa Ministerio Publico actua contra su persona.
DIARIO ta para tras di su informacionnan concreto cu e ta suministra na Pueblo di Aruba a base di conocemento profundo di DIARIO den maneho di gobernacion di un pais, cu DIARIO a proba cu DIARIO tin.
Raiz awor mira con e ta sigui dilanti den un situacion politico cu e ta perde su miembro di Partido, Geoffrey Wever, ora Sinterklaas pone regalo pa tur mucho y hende cu comporta nan mes.
No ta conoci cu na e momento ainda Geoffrey Wever por celebra fiesta di Sinterklaas cu RAIZ, pasobra e mester ta na urna electoral como Miembro di otro partido, cu ta e partido dirigi pa Gerlien Croes!
Raiz mester bay soluciona su problemanan na forma maduro!
