ORANJESTAD (AAN): Dia di juni, Dia Mundial di Medio Ambiente, Aruba a para keto pa reflexiona riba e importancia di proteha nos naturalesa y
sigui inverti den un futuro mas berde, saludabel y resiliente pa generacionnan presente y futuro.
Den luna di augustus 2025, Prome Minister Mike Eman a bishita Bario Mabon como parti di su vision nacional di reforestacion. Durante e bishita, a planta un mata hunto cu habitantenan di e bario, simbolisando un compromiso comparti entre gobierno y comunidad pa cuida y embeyese nos isla.
E iniciativa aki ta forma parti di e meta ambicioso di Gobierno di Aruba pa planta 100.000 mata durante e prome cuatro añanan di gobernacion. Segun Prome Minister Mike Eman, e vision ta bay mucho mas leu cu simplemente planta mata. E ta trata di construi un Aruba mas berde, mas saludabel y cu mas resistencia contra e efectonan di cambio climatico y secura.
Awo, casi un aña despues, e mata planta na Mabon ta para berde, fuerte y saludabel, combirtiendo su mes den un simbolo di loke por logra ora comunidad y gobierno traha hunto.
Mainwattie Persaud, habitante di Caya Butishi, a tuma riba dje e responsabilidad pa cuida e mata for di e prome dia planta.
“Desde e dia cu Mike Eman a bin planta e mata, mi a sigui muha e mata mainta y anochi. Tur dia mi ta cuida e mata. Apesar di e secura cu Aruba ta pasando actualmente, e mata a crece bon y ta mustra saludabel,” asina Mainwattie a relata.
El a expresa tambe su speransa cu Prome Minister Eman, durante un futuro bishita na Mabon, por mira personalmente con e mata a crece grandi y fuerte.
Mainwattie a haci un yamada henter comunidad pa cuida e matanan den nan propio bario y entorno.
“Mi ta spera cu tur hende cuida e matanan den nan bario/comunidad, pasobra asina nos por haci Aruba mas berde, mas bunita y mas agradabel pa tur hende. E matanan no solamente ta embeyese nos isla, pero tambe ta yuda nos medio ambiente,” el a expresa.
E historia di e mata den Mabon ta demostra cu reforestacion no ta termina ora un mata wordo planta. E berdadero exito ta depende di e compromiso, dedicacion y amor cu comunidad ta mustra posteriormente pa mantene e matanan bibo y saludabel.
Dia Mundial di Medio Ambiente ta sirbi como un recordatorio cu cada mata planta awe ta un inversion den e Aruba di mañan. Gobierno di Aruba ta sigui comprometi cu e programa di reforestacion y cu e vision di crea paso pa paso un isla mas berde y sostenibel.
Comision di Desaroyo y Bienestar di Bario Mabon a expresa su sincero gradicimento na Mainwattie Persaud pa e dedicacion y compromiso cu el a mustra durante e ultimo 11 luna den cuido di e mata planta na Mabon. Segun e comision, su esfuerso diario ta un ehempel inspirador di con ciudadano y comunidad por contribui activamente na un Aruba mas berde y cu miho calidad di bida.
“Hunto nos ta planta awe, pa Aruba florece mañan.”
{gallery}Dia Mundial di Medio Ambiente Un Mata, un compromiso- un futuro mas berde{/gallery}
