ORANJESTAD (AAN)-- Tur aña, riba dia 15 di October ta wordo observa e Dia Mundial di Garoti Blanco cu strepi.
Esaki ta un fecha dedica na considera y promove e derechonan, autonomia y inclusion di e personanan no vidente of cu limitacion visual.
E fecha aki ta un simbolo di independencia: E garoti blanco ta e herment principal cu ta permiti e personanan cu ciego of cu limitacion visual, desplaza nan mes di manera autonomo y sigur door di tur espacio publico.
E dia aki a wordo proclama, oficialmente, na aña 1980 door di Union di Personanan Ciego na Paris. Su antecedentenan ta remonta na e decada di 1920 y 1946, cu e diseño moderno adapta pa Richard Hoover.
Durante e dia aki ta wordo realiza campañanan educativo pa siña e poblacion con pa interactua cu e usuarionan di e garoti blanco y con pa construi ambientenan mas accesible.
Na Aruba, esaki ta un fecha cu ta haya hopi atencion for di Fundacion FAVI, y di pueblo en general.
Segun informacion disponible pa DIARIO, Fundacion FAVI a organiza un serie di actividad di concientizacion y demostracion publico cu a cuminza for di September ultimo.
Tambe, for di FAVI su social media tin e detaye, cu na final di September pa cuminzamento di October awo, FAVI, representa pa e terapista di rebalidacion Sary Wernet-Kelly, y su team, a cuminza cu demostracionnan practico riba caya pa siña comunidad con e garoti blanco cu strepi cora ta funciona y con pa duna prioridad na peatonnan cu limitacion visual.
FAVI a comparti puntonan clave pa automobilistanan na scol, supermercado y den trafico, pa para na tempo ora nan mira e garoti lanta y duna señal di asistencia.
