Lema 2024: “Awa pa Paz”
ORANJESTAD (AAN) – Cada aña, riba dia 22 di Maart, ta wordo celebra Dia Mundial di Awa, danki na un iniciativa di Nacionnan Uni na aña 1993, cu e meta di destaca e importancia di awa pa e medio ambiente y e bienestar humano.
Organizacion di Nacionnan Uni (ONU), su proposito ta pa concientiza e socidad mundial pa impulsa e accionnan cu ta permiti mehora e acceso na awa limpi y saneamento na henter mundo, impulsando e cumplimento di e OD6 di e Agenda 2030.
Pa aña 2024, pues e aña en curso, e lema di Dia Mundial di Awa ta “Awa pa Paz”. Segun e Organizacion di Nacionnan Uni, awa por propicia e paz ora cu e comunidadnan y e paisnan ta contribui rond di e recurso fundamental aki. No obstante, tambe por aumenta e tension na momento cu e ta scars, a bira contamina of e personanan tin acceso desigual na dje.
P’esey, ONU ta afirma cu “e prosperidad y paz ta depende di e awa” y e ta enfatiza cu e paisnan “mester ubica nan cooperacion den materia di awa den e centro di nan plannan”, enfrente di e desafio cu ta suppose ta wordo causa door di e cambio climatico, migracionnan y inestabilidad politico.
E Organizacion di Nacionnan Uni ta splica cu “conforme e impacto di e cambio climatico ta aumenta, ta existi e necesidad apremiante, na escala nacional y internacional, di uni nos tur pa proteha y conserva e elemento vital aki”. Ademas, cu e aumento di e poblacionnan, ta adverti, e awa lo bira cada bez mas importante den e lucha contra pobreza y deterioro di e medio ambiente.
