E cuna di Epoca di Oro di Siglo 20 a nace den horor humano!
- Veteranonan a splica DIARIO e final Hulandes di e fierno di Hitler
- Awe lidernan ta pidi mundo pa prepara pa guera nobo na caminda
ORANJESTAD (AAN) Pandemia di COVID-19 a entrega mundo e prueba, kico ta nifica biba den miedo constante ora tur hende mester wordo considera peligro di morto pa otro y hende perde su libertad pa ta y por haci loke e kier.
Segunda Guera Mundial a plama e realidad di guera na mundo. Hende a perde tur derecho humano y hende a wordo someti directamente na abuso di un mente sin piedad, cu sigur ta cualifica e homber cu e nomber di Adolf Hitler.
E articulo aki a nace realmente 25 aña pasa, tempo mi persona tabata un estudiante hoben na Universidad di Groningen, caminda e club di estudiante Magna Pete a wordo pidi pa participa den e celebracion di 25 aña liberacion di Hulanda.
Siendo studiante na Groningen, ya un persona sigur den e tempo tabata directamente mara na bida cotidiana di e provincianan cu a bira e parti di Hulanda cu mas a sufri durante Segundo Guera Mundial.
Mi persona a wordo pidi pa forma parti di e grupo di ciudadanonan di Groningen, cu mester a saluda y compaña gruponan di Veteranonan di otro partinan di mundo, cu tabata participa na celebracion di 25 aña fin di Segunda Guera Mundial.
E veteranonan cu a uni na costa Frances pa simula e inicio di fin di Segunda Guera mundial cu entrada di tropnan di liberacion na Francia, a continua nan ruta pa simula e liberacion di paisnan Europeo di gara di Hitler.
Entrada di e tropanan na Groningen tabata algo increibel 25 aña despues cu e libertadornan di 1945, a bolbe y hunto a celebra nan entrada y e triunfo di mundo for di e epoca di Hitler.
Kico tabata guera realmente, ya tabata comprendibel na Groningen, caminda campesinonan tabata splica con tropanan di Hitler tabata subi nan tereno, exigi tur nan animalnan cu tabata nan fuente di alimento mescos cu nan trigo pa e Alemannan come y destrui e Hulandes.
Groningen ta parti di e teritorio Norte Hulandes cu no por a wordo libera y inicialmente debi na e circumstancianan di clima den winter loke a haci cu hendenan no tabata tin cuminda ya cu tur loke nan por a come a wordo kita for di nan boca dor di e tropanan.
Hende inocente tabata wordo mata sin un huicio pero solamente pa e miedo di e soldatnan di Hitler cu nan por wordo contesta cu hende arma cu ta defende nan curpa.
Teror ta loke Hulanda a conoce. Raiz di mata tabata tabata wordo uza como alimento den desesperacion.
Den combersacion cu e soldatnan veterano di e tropanan Canades, Mericano, Ingles cu a yega Europa pa simula e liberacion di Europa, DIARIO por a wordo entrega e storia di confronta y lucha contra morto dia tras dia.
Genever a tene e luchadornan riba pia den un guera atroz den un clima inclemente na e parti mas friu di Hulanda cu den e asina yama “invierno”di hamber a conoce desesperacion.
Kico guera realmente ta nifica ora tende relatonan di soldatnan Aleman, cu si nan no mata, nan ta wordo mata.
Hende a perde balor total den un guera cu a produci capitalnan enorme na mundo cu pa restora su mes a crea un economia asina grandi cu e dolor di guera a bay perdi den e oro di economia mundial cu el a produci.
Historia di Aruba ta entrega prueba di e realidad di Segunda Guera Mundial, cu a menaza Aruba directamente cu na mes momento a registra e poder petrolero grand hasta den guera pa medio di Lago, cu a sostene e victoria di aliadonan cu entrega di combustibel.
Na Groningen, veteranonana a splica situacionnan cu ta keda dificil pa tur cu no a conoce guera directamente, comprende.
E crueldad di hende cu ta wordo dirigi pa monstruonan manera Hitler cu locura di poder!
Celebrando 25 aña fin di Segundo Guera Mundial na Groningen, e storianan entrega dor di veteranonan cu a entrega nan bida pa otro por biba, a entrega na nos e parti di historia cu a bira modelo pa loke mundo ta pa un gran parti awe.
Na e momentonan aki, mundo ta arma atrobe den un situacion cu cualkier momento lo bira guera, pero mucho mas decisivo cu nos mes por pensa.
Pasobra algo grandi nos por a siña di veteranonan. Hende no kier realiza kico ta guera, manera awe nos no kier realiza, kico ta nifica cu na un mundo di hamber y dolor, sumanan enorme ta wordo reserva pa guera cu atrobe kier bira nos realidad.
Observando 80 aña fin di Guera Mundial, cada hende awe tin e tarea pa puntra nan mes como ansia pa poder, ta pone hende destrui otro, loke realmente ta e motibo pa guera.
Como estudiante mi a uni ayera na e grupo pa saluda ehecitonan di Aliadonan celebrando 25 aña liberacion di Hulanda, Bevrijding.
Awe mi tin simplemente e tarea pa pidi mundo pa prepara su mes pa guera atrobe. Kico hende a siña tur e tempo? Esey ta keda mi pregunta.
Jeannette L. (Jenny) Cratz
