Señor Gerro Koolman di IBiSA
ORANJESTAD (AAN): Den su mision pa fortifica un comunidad saludabel, IBiSA ta invita tur ciudadano di Aruba pa un chekeo di salud general cu lo tuma luga diasabra 6 di december na IBiSA Sport Centrum na San Nicolas, di 8:00 am te 12:00 pm. E informacion aki a wordo comparti pa señor Gerro Koolman di IBiSA durante un entrevista cu DIARIO.
Señor Koolman a enfatisa cu e evento ta completamente gratis y abiertamente dedica na bienestar di nos pueblo. Pa participa, ciudadanonan solamente mester yega na e sportcenter na yuna (sin come).
Durante e chekeo, lo por haci test di presion, sucu, peso y haltura pa calcula e Body Mass Index (BMI). Tambe por haci test di presion di wowo. Tur resultado lo wordo entrega di biaha.
Ademas di e chekeonan menciona, profesionalnan di salud cu lo ta presente lo brinda orientacion riba estilo di bida pa yuda ciudadanonan hiba un biba mas saludabel y preventivo. Cu e iniciativa aki, Ibisa ta continua cu su accionnan pa eleva bienestar general di Aruba y pa sigui sirbi den desaroyo di un comunidad fuerte y saludabel.
