Fiscalista di DIMP, Angeline Geerman-Giel:
ORANJESTAD (AAN) – Fiscalista di Departamento di Impuesto (DIMP), Angeline Geerman-Giel, den entrevista cu DIARIO a indica cu dia 15 di Augustus ta e fecha cu e comerciantenan ta bay haci declaracion riba nan benta di e Luna di Juli, y aworaki cu e Ley BBO na Frontera a drenta na vigor dia 1 di Augustus, ta dia 15 di September nan ta bay declara e volumen di benta di Luna di Augustus.
Geerman a bisa cu e comerciantenan cu ta registra na DIMP ta bay wak den nan impuesto portal (Bo Imp Portal) e declaracion di impuesto di BBO, cu lo ta disponible dia 4 di September. Kiermen, nan ta bay wak den nan aangifte di BBO e total di e suma di BBO cu nan a paga na Frontera na Luna di Augustus, y nan ta bay declara manera nan ta haci actualmente, nan volumen di benta di e Luna di Augustus.
“Y, nan por deduci e ora ey e BBO paga na Frontera, cu a wordo paga riba productonan comercial. Esey por wordo poni den deduccion y nan ta paga e diferencia, of si tin cu haya placa bek si nan a paga mas na importacion di locual ta nan volumen di benta. Anto si e volumen di benta no tabata suficiente e Luna aki, kiermen e benta ta slow, e ta suppose di paga menos BBO, y e ora ey e ta haya un restitucion di e BBO paga na Frontera, y esaki lo bay automaticamente tambe” Geerman Giel a menciona.
Kiermen e comerciante lo haya esaki dentro di un luna, si en dado caso, el a paga mas na frontera cu locual e mester paga of for di su volumen di benta, el a reitera.
El a sigui bisa cu pa bin na remarca pa deduccion mester ta un comerciante registra na Departamento di Impuesto como tal. “E ora ey e tin derecho na un deduccion di 100% di e BBO paga na Frontera”, señora Geerman a splica.
