Kimberly de Cuba-Kelly:
ORANJESTAD (AAN) — Kimberly de Cuba-Kelly, Trahado Social na Telefon pa Hubentud (FTPH), a bisa den e parti final di un entrevista cu DIARIO, cu varios hoben ta menciona kico précis nan kier for di nan mayornan.
El a splica cu Telefon pa Hubentud tin un proyecto cu a lanza aña pasa, cu yama “Chic Chat” den cual tin un episodio cu yama “Parents Relationship”, y den esaki e hobennan mes a duna diferente ehemplo hopi simple, cu nan lo kier pa nan mayornan haci cu nan, Kimberly a acentua.
Pues, di parti di e hoben mes FTPH ta ricibi comentarionan cu tin falta di comunicacion entre mayor y yiu, Kimberly a indica.
Kimberly a menciona cu FTPH tin un charla cu ta dunando caba tocante comunicacion. “Nos a cuminza for di 6de klas, pasobra na e momento ey e hoben ta prepara pa bay un ‘voorgezet y esaki ta momentonan cu retonan mas grandi ta presenta, y pesey ta importante pa e hoben por sa con pa comunica cu e mayor.
“Di parti di e mayor mes scolnan ta organiza anochi pa mayornan, y semper nos ta wak cu e asistencia di esnan cu ta participa den e reunionnan aki ta hopi tiki. Toch nos ta wak con e mayornan ta haya informacion. Locual si mi tin cu bisa ta cu varios hotel, organizacion y companianan grandi, ta invita nos pa asina nan empleadonan den horario di trabao por pasa cerca nos den un localidad na e trabao mes, cu nan por haya tur informacion. Asina toch nos ta purbando pa mayornan haya informacion”, Kimberly de Cuba-Kelly a conclui.
Por ehemplo un caso cu e hoben ta menciona cu lo kier pa su mama, un atardi sinta bebe un copi koffie cu ne, anto e por cont’e con su dia a bay, cosnan cu e ta pasando, su preocupacionnan, pero esey ta cosnan cu no ta mira cu ta pasando den nos comunidad di awe.
