KINGSTON: E ex-senador Haitiano, esta John Joel Joseph kende tabata wordo busca door di autoridadnan na Haiti
den e investigacion di asesinato di president Jovenel Moise na Juli cu a pasa, a wordo aresta na Jamaica, segun un fuente di Polis di Jamaica a bisa.
Joseph a wordo aresta Diasabra madruga y aworaki ta encarcela na un Warda di Polis.
Forzanan Hudicial di Jamaica a cuminza coordina cu nan ‘socionan internacional’ y a haya indicacion cu tabatin informacion di inteligencia cu a yuda nan bay na e lugar unda e homber aki tabata scondi.
Nan no a bisa exactamente na ki parti di Jamaica e ex-senador a wordo aresta, y tampoco tin informacion si acaso el a wordo aresta cu algun otro persona.
E President Haitiano a wordo asesina na Juli, pero apesar cu a detene varios sospechoso, te cu awor tin hopi incertidumbre rond di e acto mes di asesinato. E mesun luna ey ya oficialnan Haitiano a publica un borchi di ‘Ta Busca’ cu potret di John Joel Joseph, cu nan a describi como un individuo ‘peligroso y arma’.
Apenas na comienzo di Januari aki mes, Merca a acusa Mario Palacios, un ex-militar Colombiano kende ta wordo nota como participante di e grupo di 20 homber cu a mata Jovenel Moise y a herida gravemente su casa na nan Cas Presidencial na Port-au-Prince dia 7 Juli 2021.
Mario Palacios tambe a wordo deteni na Jamaica, prome cu el a acepta un ‘extradiccion voluntario’, pa presenta dilanti Husticia Mericano. Si e wordo haya culpable, e por haya castigo di prison pa bida largo.
Mas di 40 persona, entre nan 15 Colombiano y Mericanonan di origen Haitiano, a wordo aresta relaciona cu e investigacion.
Pero keto bay tin hopi pregunta cu ta draai rond di e motibonan di asesinato, cu a pone acerca aun mas den incertidumbre e pais Caribeño aki cu ta keto bay isola pa pobreza, inseguridad, y corupcion.
