El a gana cu un Lotto Loco ---ORANJESTAD (AAN): E atardi pa anochi di Diasabra 9 di October tabata uno hopi druk na Aruba.
Hopi hende aglomerando na oficinanan di bende Lotto, pa asina cumpra un ticket di 4 Florin purbando di por haya chens di bira miyonario.
E premio di Lotto 5 e anochi ey a yega 2.000.000 Florin. E tabata asina grandi, cu hasta hendenan di Curacao tabata manda pidi famianan na Aruba pa bay cumpra ticket cu nan numbernan.
DIARIO a haya informacion cu hasta turista cu tabata na Aruba a pasa bishita oficina di Lotto pa cumpra ticket. Pasobra un jackpot riba di 1 miyon Dollar tambe ta hopi atracivo.
E anochi ey na TV, e presentador Isai Labadie a anuncia e numbernan ganador cu a bira 05, 19, 20, 23, y 30.
E anochi ey mes e computer di Lotto a registra cu tin un ticket cu e combinacion exacto ey, y el a wordo bendi na Manton Lottery na Sabana Basora. Inmediatamente diferente persona den area di Sabana Basora a cuminza check ta kende lo a bira e ganador di e premio.
Durante henter siman cu a pasa, hendenan a keda warda anciosamente pa mira ki ora e ganador of ganadora ta bay busca premio. Pero siman a finaliza y ningun ganador a presenta. Algun ciudadano a hasta cuminza specula cu e ganador kizas lo ta buscando un abogado pa bay cobra e premio.
GANADORA A YEGA: Sinembargo net 9 dia despues di e sorteo, riba Dialuna 18 di October 2021 den oranan despues di merdia, e ganadora Cornelia cu su famia a presenta na oficina di Lotto na Playa pa reclama nan premio.
Aki mesora e funcionarionan di Lotto 5 a check si acaso Cornelia a pone su firma patras di e ticket, hunto cu e number di banco y e nomber di banco.
Ora di a scan e barcode den computer, inmediatamente esaki a confirma cu Cornelia a gana e suma di 2.000.000 Florin.
Despues a sigui e proceso pa transferi e premio electronicamente pa su cuenta di banco, y tambe saca e acostumbrado potret.
Cornelia tabata hopi contento cu el a gana e premio di mas grandi di Lotto 5 awor pa 2021. El a bisa cu el a gana pa colmo cu un ticket di Lotto Loco. Esey ta un ticket unda e computer mes a genera un combinacion di number pe.
Lotto a confirma cu esaki tabata e prome premio miyonario di Lotto 5. Aunke a mustra cu Fundacion Lotto pa Deporte a conoce 2 otro miyonario den 2021 cu otro sorteonan.
Un palabra di pabien ta bay na Cornelia y su famia, y sigur nan lo bay haci bon uso di e inyeccion financiero aki.
Lotto, e loteria di Aruba tin diferente wega, Catochi, Big 4, 1-OFF, Zodiac, Wega di Number di Korsou di Lotto, Lucky 3, Multi-X, Lotto di Dia, Lotto 5, Mini Mega y cu su Mega Plus y e diferente weganan di Raspa y Gana. Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
