Dalgis Montalvo ta señala:
ORANJESTAD (AAN) – Directora di Cuido Ambulante (GGC) y Salud mental, señora Dalgis Montalvo, a señala cu enberdad Stichting Hunto tin algun tempo cu a tuma forma, pa loke ta Sociaal Psychiatrische Dienst (SPD) y Fundacion pa Maneho di Adiccion Aruba (FMAA).
Montalvo a menciona cu Hunto ta trahando pa yega na un structura y un maneho cu ta duna su fruto tambe.
E problema di adiccion y di salud mental ta algo cu nan tine aña aden, aña afo, pero nan ta mira cambio bao Stichting Hunto actual, unda cu por yega hopi mas lihe na materialnan y tur e hermentnan cu mester pa brinda un miho ayudo.
“Aworaki, pa loke ta e problema di adiccion esaki ta algo cu tin añanan y nos ta purbando di structura e procesonan cerca nos trahadornan mes, pa nos por brinda un miho ayudo”, Dalgis Montalvo a reitera.
Encuanto e situacion di dañonan cu ta wordo haci na monumentonan, mi ta kere cu no ta solamente Stichting Hunto tin parti na esaki, pero tambe tin e area di husticia. Dalgis Montalvo a subraya cu na momento cu un persona comete un delito, esaki mester wordo ataca como un delito, pues e ora ey husticia mester tuma paso, no importa si e persona ta un adicto el a comete un delito y mester wordo castiga pa esaki.
Montalvo a sigui splica cu na momento cu SPD y FMAA a join Stichting Hunto, tin hopi proceso y hopi cambio a tuma lugar y na diferente departamento cu tabata tey nan ta purbando di duna nan contenido y di acerca e profesionalnan tambe pa brinda un miho ayudo. Nan tin e parti di e “basis GGZ” cu ya caba, yegando e prome aña, nan ta evaluando kico tur ta e problematica cu a drenta, kico tur ta wordo haci, kico ta e diagnosis cu a bin padilanti.
Tambe tin e team cu, conhuntamente cu gobierno, a wordo lanta pa por aborda a adictonan. E idea ta pa nan bay cerca e adictonan activo riba caya pa nan por drenta den un proceso di rehabilitacion, y e proceso aki ta boluntario, kiermen cu e persona adicto aki e mes kier wordo yuda.
E dama a indica cu riba e prome luna di e team aki, ya tabata tin cinco cliente cu tabata bin constantemente, y pa un periodo largo, y despues a wak cu realmente nan kier un programa di rehabilitacion y a drenta Centro Colorado.
“Por wak cu e ta canando. E no ta 100% y na ningun parti na mundo. Pero e persona aki mester por kier ayudo. Pero no solamente e persona sino su familia tambe mester ta envolvi”, Dalgis Montalvo a señala.
