Robert Maduro di DCA:
ORANJESTAD (AAN) – Robert Maduro, miembro di e staff di Departamento di Cultura Aruba (DCA), den e Seccion di Organizacionnan Gubernamental y NGO’s, a elabora den conferencia di prensa, tocante e proyecto cu DCA tin pa Luna di Mei aki.
Esaki ta un otro proyecto cu ta wordo auspicia bao Ministerio di Cultura, cual ta e “Encuentro Multicultural” cu lo tuma lugar dia 21 di Mei aki, y cu inscripcion ta habri pa tur cu kier participa.
“Encuentro multicultural ta un evento na unda exposicion gastronomico, artesanal y intercambio artistico y tambe multidisciplinario ta wordo presenta, y tur esaki ta tuma lugar riba mesun tarima”, Robert Maduro a menciona.
E actividad aki ta relaciona cu e “Dia Mundial di Diversidad Cultural pa Dialogo y Desaroyo”. Maduro a indica cu desde aña 2006 y 2007, e tempo ey den Luna di October, Ministerio di Cultura y Labor, Comision Celebracion di Dia Nacional, cu Instituto di Cultura Aruba, y participacion di instancianan gubernamental y otro gruponan no gubernamental (NGO’s) a organiza e prome Feria Multicultural.
Despues e evento a cambia di nomber pa Encuentro Multicultural, pasobra Aruba ta un pais den cual residentenan di diferente nacionalidad ta biba hunto, y akinan tambe ta na unda nan kier a trece dilanti cu integracion pa Departamento di Cultura ta hopi importante, Maduro a señala.
“Integracion di e colonianan cu ta biba na Aruba fuera di esun si nos mes. Un expresion hopi popular, cu semper DCA ta mantene na halto, ta un di señor Lio Booi, un di e autornan di Himno Nacional di Aruba, y prome director di Departamento di Cultura, ken a bisa: ‘Pone e Arubiano na haltura di su cultura y siñe conoce e di otro’, y esey ta e meta tambe di un encuentro multicultural aki”, Maduro a reitera.
E mision di dje ta pa promove cultura di Aruba den cada colonia y basa nos mes riba un encuentro real, pa por comparti tur e rikeza di e expresionnan mas destaca y representativo, di cada pais. Ademas, uni na e iniciativa di UNESCO, y celebra e Dia di Diversidad Cultural.
E meta di e proyecto aki ta, Robert Maduro, ta splica, crea un lugar di encuentro di intercambio cultural entre e habitantenan di Aruba, esta personanan di tur nacionalidad y raza. “Pa asina reconoce nos mes cerca e culturanan di otro”, Robert Maduro a expresa.
“Crea ambiente di convivencia pacifico unda respet, tolerancia, libertad di expresion artistico y cultural ta resalta pa despues sigui divulga y promove esaki”, Robert Maduro a indica.
E gruponan di enfoke di e programa cultural aki ta Consuladonan General y Diplomatico na Aruba, gruponan cultural di otro paisnan estableci na Aruba y tur artista en general.
“Aki mi kier haci un yamada na tur departamento y consuladonan y diplomatico. Ya nos a manda carta pa anuncia e proyecto pa nan por inscribi cerca nos, si nan ta desea di participa den e evento multicultural aki. Corda bon cu e ta dia 21 di Mei aki. E lider di e proyecto aki ta John Freddy Montoya, pues por email e formulario na su persona, of trece na DCA.
