Minister Ursell Arends:
ORANJESTAD (AAN): Ministerio di Transporte ta orguyoso pa anuncia firmamento di dos acuerdo significante di entrenamento cu International Civil Aviation Organization (ICAO). E acuerdonan aki a wordo firma dia 1 di mei 2024 durante e “Global Implementation Support Symposium” cu a tuma luga na Republica Dominicana.
E acuerdonan a wordo firma door di Sr. Juan Carlos Salazar, Secretario General di ICAO, y Sr. Edwin Kelly, Director di Departamento di Aviacion Civil di Aruba. Como testigo di e firmamento a fungi Sr. Salvatore Sciacchitano, Presidente di Conseho di ICAO, Sr. Ursell Arends, Minister di Transporte, Integridad, Naturalesa y Asuntonan di Adulto Mayor y Sr. Christopher Barks, Director Regional di ICAO pa Norte-America, Centro-America y Caribe.
E prome acuerdo ta un acuerdo general di entrenamento, cu ta habri e porta pa diferente entrenamento tecnico y operacional wordo duna door di ICAO na Aruba, tanto den forma fisico como den forma online. E segundo acuerdo ta un acuerdo di entrenamento specifico tocante evaluacion y supervision di sistemanan di gestion di siguridad operacional (“Safety Management System”). E entrenamento specifico aki, ICAO lo duna fisicamente na Aruba pa personal tecnico di Departamento di Aviacion Civil.
Cu esaki Gobierno di Aruba, en particular Minister di Transporte, Integridad, Naturalesa y Asuntonan di Adulto Mayor ta duna contenido na su compromiso pa inverti den personal di Departamento di Aviacion Civil di Aruba pa asina garantisa cu e Departamento aki lo por sigui cu su trabou importante pa asegura siguridad di Aruba su transporte aereo, di cual nos turismo ta depende asina hopi ariba.
