Director di Aduana, Rodererick Croes:
ORANJESTAD (AAN) Director di Aduana, señor Roderick Croes, a splica den entrevista cu DIARIO cu, naturalmente, Departamento di Aduana tambe mester di mas personal.
“Si nos wak landspakket, tin diferente aspecto den dje ta toca Aduana. Un di e aspectonan ta cu ta bisa cu no mester subi e costonan di salario di gobierno, pero di otro banda ta bisa pa no mishi cu Aduana, polis ni Swat, pasobra nan ta dienstnan cu nos mester na frontera”, señor Croes a señala.
El a agrega cu otro banda, e Landspakket ta bisa cu Gobierno mester bin cu mas iniciativa pa stimula importacion, y esey, naturalmente, ta bay nifica mas importacion. “Tambe Landspakket ta bisa cu mester stimula mas inversion pa construccion di edificio nobo, y esey tambe ta nifica mas importacion, pues, mas trabao pa Aduana. Di otro parti, mester di mas control den frontera y lo mester bay fortifica esaki loke ta nifica tambe mas trabao pa Aduana”, director di Aduana a señala.
El a agrega cu e departamento mester di mas duanero, y tin un reunion planea pa wak con leu por yega cu e Minister nobo, p’asina por agenda e afspraaknan necesario, pa loke ta empleado, structura y tur e otro aspectonan.
Señor Croes a indica cu tin varios solicitud di trabao pa Aduana, pero ta ora e ofertanan sali den prensa, por cuminza solicita.
“Ami lo a desea cu pa e aña aki nos cuminza tuma entre 20 pa 22 hende, pero e necesidad ta hopi mas cu esey. Den e siguiente diez añanan mas of menos 23 trahador ta laga e dienst y mester tin empleado nobo cu drenta y tambe e opleiding nobo cu mester bin”, señor Croes a relata.
