Meredith Faarup y Annemarie Navas a splica: ---- ORANJESTAD (AAN) – Dialuna a tuma lugar un conferencia di prensa yama pa e Departamento di Educacion di FAVI (Fundacion Arubiano di esnan Visualmente Incapacita),
den cual a informa tocante e video di concientizacion y e website educacional, cu dentro di poco lo wordo lanza.
Señora Meredith Faarup a duna di conoce cu su persona hunto cu su colega Annemarie Navas, lo ta lanzando dentro di poco nan video di concientizacion y nan site educacional.
Faarup a gradici Cede Aruba, Pitch Time, y Gerencia di Triple A, pa a mira e importancia di e proyecto aki y aporta financieramente na dje, y el a expresa cu e ta spera cu den futuro por sigui traha hunto, den proyectonan similar.
El a gradici tambe e studiante di Instituto Pedagogico Aruba (IPA) Michelle Solis- Montoya, cu a studia pa “Bachelor Papiamento”, ken tabata tin un papel hopi importante den e desaroyo y a sostene hopi henter e proceso di FAVI su site educacional, y cu tabata tin e tarea di revisa y coregi Papiamento. Tambe el a yama un danki di curazon pa tur nan clientenan y docentenan cu a forma parti di e proyecto grandi aki.
Seguidamente, Annemarie Navas a amplia riba e proyecto aki, ken a bisa cu hopi biaha tin e tendencia di pensa cu limitacion di bista solamente ta pa adulto, pero nos muchanan tambe por tin limitacion di bista y den e conferencia di prensa aki, a para keto un rato riba e señalnan cu por presenta.
“Si bo ripara cu e mucha tin e obheto demasiado cerca di su cara, of e ta trompica frecuentemente, esaki ta señalnan cu por ta cu e mucha su bista, ta limita”, Annemarie Navas a splica.
E dama a agrega cu e video ta pa concientiza comunidad, pero tambe pa duna sosten na docentenan cu, diariamente, ta traha cu mucha cu limitacion di bista; y tambe, e futuro docentenan cu tambe lo por haya mucha cu limitacion di bista den nan klas.
“Durante añanan nos ta ripara cu mas y mas cliente ta acerca FAVI pa ayudo y tambe hopi interes halto pa e banda di enseñanza. Scolnan y maestronan kier mas tipnan practico pa traha cu mucha cu limitacion di bista. Tur esaki a motiva FAVI pa bin cu un site educacional, unda cu maestronan por haya tur e informacion necesario, pa traha cu cliente cu limitacion di bista”, Annemarie Navas a señala.
Tur persona interesa den informacion tocante limitacion di bista por subi e site: www.educa.favi-aruba.org. Riba e site por haya cuater categoria unda por haya e informacionnan, por ehemplo tocante: E guia trempan pa mucha di 0-4 aña; e guia pa mucha ciego y tambe e guia pa mucha cu limitacion di bista, sin laga afo tur e derechonan cu e muchanan aki, cu limitacion di bista, tin.
“Bao di carta, cada categoria tin tambe e materia cu scol ta ofrece, manera lesamento, idioma, historia, cu e docentenan por scoge y bay riba dje, pa asina haya mas informacion”, Annemarie Navas a splica.
El indica cu nan ta bay sigui amplia e website cu mas informacion y temanan di interes, pa tur e docentenan na Aruba.
E studiante di IPA, Michelle Solis- Montoya, tambe a hiba palabra y a menciona cu esaki ta un idea cu el a palabra cu su dos guianan, y nan a dune e confianza y e chens pa forma parti di e proyecto aki. El a gradici FAVI cu a habri su portanan pe, y sigur na Meredith y Annemarie di e departamento di guia educacional. Esaki ta un proyecto cu nan a cuminza na Maart y cu awo por fin, a bira realidad.
