Dennis Burke cu anuncio sorprendente di retiro di Centro di Bario Playa Pabao

Despues di 25 aña...

• Casi no tin hende mes di Playa Pabao mas den directiva

ORANJESTAD (AAN): E homber multi-facetico y cu pa mas di mitar cuart siglo tabata ser mira como e ‘personahe’ principal di Centro di Bario Playa Pabao, a tuma e decision y desde 1 di April 2026 a entrega su retiro como President.

   Ta trata aki di Dennis Kenneth Burke, kende riba Diaranson atardi a convoca un conferencia di prensa pa splica e motibo pakico el a entrega su retiro como President di Centro di Bario Playa Pabao.

   Semper den pasado ora cu Burke tabata duna conferencia di prensa, su declaracionnan ta hopi corto.  Pero e biaha aki el a bay hopi extenso pa demostra e logro cu Playa Pabao a haya su centro, e funcion cu el a sirbi e comunidad ey, con el a crece, con antes tabata hiba discusionnan sano den directiva, pero cu awor a cambia di sistema y cu prensa ta conclui cu e desviacionnan aki y mas ta loke a pone cu Burke a dicidi na tuma su retiro.

   Na prome instante, e fecha di 1 di April a pensa cu ta un chiste esaki ta, pero Burke a splica cu e ta serio, y su ultimo dia di funcion como President y miembro di Directiva ta Diabierna, 1 di Mei 2026.

   E comienso: Burke a splica cu semper e tabata interesa den e trabao di Centro di Bario y Clubnan Social den barionan na Aruba.  E ta corda con como hoben e tabata bishita Centro di Bario Noord pa actividadnan di Aña di La Reina y tambe Carnaval.  E tabata bishita Sportboys na Angochi pa nan Deramento di Gai.  Tambe e tabata bay Centro di Bario y Deporte Dakota.  Semper cu e deseo cu un dia, Playa Pabao tambe por haya un centro asina.

   El a bira contento notando cu Stichting Centro di Bario Playa Pabao a wordo funda, y cu Sr. Luis Fingal tabata president.  Sr. Fingal tabata hefe di Burke na Inspectie der Belasting.  E siguiente dia el a acerca Fingal y a inform’e di tin deseo di forma parti di su directiva.  Mesora Fingal a invita Burke pa proximo reunion, y aki hunto cu otronan a wordo eligi pa forma parti di directiva.  Dos luna despues Burke a wordo apunta como Vice-President.

   Durante reunionnan e topico semper tabata, kico mester haci pa crea un miho bario, y e amor pa bario tabata hopi grandi.  Esey mester ta garantia pa e centro ta exitoso.  Actividadnan tabata ser haci den Franciscus College.  Despues di 5 aña el a entrega su retiro, pasobra su filosofia ta cu otro mester tuma e trabao over, y e logro grandi di nan ta cu nan a haya nan mesun edificio.  Actividadnan asina a start den nan propio edificio, y Burke ta hopi orguyoso di e logro ey di e directiva di e epoca ey.

   Burke a bin bek basa riba estimulo di grupo di amigo kendenan a acerk’e pa forma parti di directiva.  “Ami cu ta gusta e trabao di bario, no por a bisa no.  Pero si mi a bisa cu mi lo tey bek pa 3 aña”.

   Motibo di retiro: Dennis Burke a desea di duna un splicacion pakico el a entrega su retiro.  “Mi ta sinti falta di participacion di nos habitantenan di pabao. Nos a entrega nos centro na hendenan cu no ta di nos bario. Hendenan cu no tin e amor pa nos bario ni e caracter fuerte cu nos ta conci pe rond di Aruba.”

   Segun Burke, e ta referi na hendenan cu ta vota “voor” djies pa bay contra dje... “Y no tin cunes cu haciendo daño na mi ta haci daño na nos bario di pabao.  Un ehempel cu Burke a duna, ta nan projectbegeleider apenas 3 luna den funcion (e tin hopi aprecio p’e) a cuminsa cu un curso di “manicure y pedicure”. Cuanto habitante di Playa Pabao lo participa na e curso aki? Un curso cu un duracion 10 siman y un duracion di 2 ora pa les. E curso aki pa solamente 50 Florin pues 2,50 Florin pa ora mientras un 60+ ta paga 5,00 Florin pa ora pa les di gym. Ami mes a yega di organiza un curso “manicure y pedicure” den pasado pa 200 Florin. Gobierno via Enseñansa pa Empleo a cobra 250 Florin. Pues no ta gran cos cu e curso aki a yena den un par di ora.”

   “Nos a trata esaki den reunion y mi ta bay menciona algun argumento cu miembronan (mayoria no habitante di nos Bario di Pabao) a uza:  Un miembro na palabra a bisa cu ‘...berdad e prijs ta hopi abao pero ban lag’e pa e biaha aki y otro biaha nos por hisa e prijs’.”  Na opinion di Burke, un fout bo ta coregi si bo no ta haci’e, bo ta haciendo 2 fout.  Otro miembro a bisa: ‘...kico CEDE Aruba lo pensa di nos si nos cambia e prijs...’  Na opinion di Burke, CEDE Aruba no tin nada di bisa den nos organizacion y mi no ta kere cu CEDE Aruba lo haci esey. Otro miembro cu mi ta considera un bon amigo: ‘...Si nos hisa e prijs nan lo caba cu nos riba Facebook.’  Burke su opinion: Riba Facebook nos no tin nodi di haci nada, Esnan cu antes a paga e prijs 200 Florin y 250 Florin lo contesta pa nos.

   Pues esey ta algun di e argumentonan cu a wordo uza.  Un habitante di Playa Pabao nan argumentonan ta hopi mas fuerte y alcaso. Na mi secretario cu ta sigui insinua cu esaki ta di dos di biaha mi ta ‘boycot un actividad’. E amor cu ami tin pa bario di Playa Pabao e no tin. Cada actividad ta mas cu bon bini. Y awo mi ta comprende e remarca di un empleado di un organizacion respetuoso na Aruba. Boso no ta pidi uitstel pa boycot atrobe. Mi a contest’e:  Nunca nos ta pidi uitstel pa boycot pero pa busca un solucion. Esey tabata un persona cu no sa e historia di Centro di Bario.  Pero contestando mi secretario.

  Mi ta corda un discusion na unda ami a propone premia e obra mas popular. No cu mal intencion. Solamente pa amigo y amiganan di e participantenan acudi na e exposicion y wak con nan amigo(a)nan obra a keda y esaki stimula nan pa nan tambe participa den futuro. Bo a hustifica cu bo nietanan a haya problema cu esaki durante les di cuarta y baile. Tur cos ta con bo a lanta bo yiu y esey ta derecho di mayornan. Mi a trata di splicabo cu den deporte ta mescos, Mi ruman homber ora cu e perde e yora pero e siguiente dia e ta e promer riba veld. Mi yiu su promer careda den coremento el a perde tambe y a yora pero a keda na nos pa yud’e y stimul’e. Su resultadonan cu a sigui ta papia pa nan mes.

   Hopi agradecido:  Burke a finaliza bisando cu e ta gradici esnan cu a yud’e durante ultimo 25 aña. “Boso tabata un estimulo pa mi y mi logronan ta papia pa nan mes. Den futuro ora cu tin un directiva cu ta consisti di habitantenan di nos bario lo mi tey. No como miembro di directiva pero boluntario. Na e habitantenan di Playa Pabao mi ta desea un directiva cu ta consisti di habitantenan di nos dushi bario pasobra: Nos mes por.  Playa Pabao te na fin di mundo.

   Riba pregunta di DIARIO, Dennis Burke a splica cu e ta saliendo di Centro di Bario Playa Pabao pasobra e no ta reconoce su mes den un directiva asina.  Pues mi no ta kere mi lo no por funciona tampoco, pasobra un hende mester ta husto den su pensamento, y scucha tambe.  Prome cu hende mete, nan mester busca informacion prome pa ta na altura di e materia.  Asina nos tabata traha antes na Centro di Bario Playa Pabao, cu hendenan di caracter y principio y cu sa con pa atende cu problema, pero na final ta keda como bon colega.

   Diabierna e lo entrega e yabi, y lo haci e entrega di esaki bon documenta di tur loke e ta lagando atras.  E yabi y tur cos lo wordo entrega na e dos miembronan cu ta habitante di Playa Pabao, cu ta bin na remarke pa haci e traspaso ey.  E lo no entrega esaki na e miembronan cu ta biba na Noord.