Francis Gomes, Director Interno di DOW:
ORANJESTAD (AAN): Francis Gomes, Director Interino di Departamento di Obranan Publico (DOW) tabata dialuna mainta durante e conferencia di prensa di gobierno y el a duna di conoce cu pa un tempo DOW tabata ocupa pa yega na un sistema structural pa e mantencion di e careteranan na Aruba cu e meta di yega na un plan pa e siguiente añanan cuminsando 2025.
Gomes a sigui bisa cu DOW tin un tempo ta haciendo evaluacion y analisis pa nan plan y asina a yega na e conclusion cu den un periodo di 25 aña lo mester rond di 480 miyon Florin pa por tin e camindanan y e infrastructura bon manteni.
El a splica cu esaki ta parti den un periodo di 1 pa 15 aña cu lo mester di 16 pa 17 miyon Florin pa e camindanan di santo cu mester haya asfalt y tambe pa por mantene e camindanan existente di asfalt cu ta detereorando. E lapso di tempo di 16 pa 25 aña, despues di a haci e trabao riba e camindanan di santo lo keda solamente camindanan di asfalt pa por mantene y pa esaki tin 20 pa 22 miyon Florin cu ta necesario.
E director interino di DOW a agrega cu e plan di mantencion cu tin pa un periodo di 25 aña a keda presenta na 2022 na Gobierno y na Departamento di Finansas pa asina por a encamina e proceso pa yega na e fondonan necesario.
Pareu cu e parti financiero, DOW a indica caba aña pasa cu e sistema di irisGo, kier mehora e sistema di haci 'opname' y pa por digitalisa esaki pa asina por tin e peticionnan di trabao di e situacionnan cu mester atende riba caminda. El a agrega cu irisGo ta un sistema di camara cu AI pa medio di cual por wak e camindanan cu ta den mal estado como tambe e vegetacion cu ta stroba cu mester atende cu ne.
Gomes a finalisa bisando cu tur esaki ta e trabaonan cu a bin ta tumando luga den e ultimo añanan y cu mester atende cu nan pa loke ta e planificacion di esakinan.
