Casi 5 ton di droga confisca riba Lama Caribe
ORANJESTAD (AAN): E barco di Marina Hulandes, esta Zr.Ms. Groningen a duna bon prestacion atrobe riba Lama Caribe, ora cu el a yuda pa asina intercepta y stroba cuatro transporte di contrabando di droga.
Desde cu e barco aki a cuminza nabega den Lama Caribe na fin di April 2022, e total di accion pa intercepta droga a yega na 13.
Den ultimo tres siman, e barco aki hunto cu US Coast Guard a sa di intercepta cuatro speedboat tipo Go-Fast y obliga nan pa stop. En total a logra di captura 4.800 kilo di contrabanda, consistiendo di cocaina y marihuana.
Prome caso intercepta: E prome a socede Diabierna 19 di Augustus 2022, ora cu Zr.Ms. Groningen a topa e prome di e cuatro speedboats moviendo riba Lama Caribe. Unavez cu nan a yega cerca di e Go-Fast aki, a saca dos speedboat special di Groningen, esta esnan FRISC. Abordo tabatin un team di abordahe combina di Wardacosta di Caribe Hulandes, tambe US Coast Guard, y tripulantenan di Zr.Ms. Groningen.
Nan a logra obliga e prome Go-Fast aki pa stop, y abordo a topa cu 4 persona y a haya bultonan conteniendo 600 kilo di cocaina. Ora di a intercepta e Go-Fast, nan a haya sosten tambe di e avion Dash-8 di Wardacosta di Caribe Hulandes.
Siguiente tres caso: E siguiente tres Go-Fast cu nan a logra di intercepta, a socede poco despues, uno tras di otro. Esakinan riba fecha 30 Augustus, tambe 1 September, y 3 di September. Den e tres casonan aki hunto, a logra di confisca 4.200 kilo di droga y nan a detene 10 sospechoso.
Asina en total 14 sospechoso a wordo traspasa na US Coast Guard pa nan sigui cu e caso, investigacion, y persecusion di e personanan aki. E droga mes a wordo destrui.
Cu e captura di droga aki, awor e barco Groningen tin en total 15.000 kilo di droga confisca desde April 2022 te cu awor.
E barco Zr.Ms. Groningen ta den Caribe como Stationschip y ta trahando alternativamente hunto cu Wardacosta di Caribe Hulandes y US Coast Guard den operacionnan anti-droga.
