Presidente di TOPA, Alfonso Tromp:
ORANJESTAD (AAN) – Den entrevista cu e presidente di Sindicato TOPA, señor Alfonso Tromp, a elabora tocante cierto desaroyonan cu ta pasando na Imigracion Aruba, cu 18 empleado so.
Alfonso Tromp a indica cu prome cu e duna e informacion aki el a tuma contacto cu nan representante na Imigracion, señor Martis.
Tromp a haya algun splicacion di kico ta andando. Na prome lugar tocante e falta di personal na Imigracion, el a wordo informa cu tin nuebe miembro nobo cu ta preparando, y na Juni nan ta keda cla pa wordo instala oficialmente. Tambe el a wordo poni na haltura cu tin seis Marechaussee cu ta support e departamento, haciendo un bon trabao.
Nan ta trahando haciendo control pa detecta passport falso, y trabao en general.
Alfonso Tromp a puntra con e reaccion di e empleadonan ta tocante esaki, y señor Martis a bise cu nan ta pro. El a splica cu e tin entendi cu na November y December tabata tin e problema di poco personal pa atende cu cantidad di turista cu a yega Aruba y sali di e isla, y nan a disgusta y trata e personal no mucho bon.
Pero aworaki, cu nan ta hayando ayudo di Marechaussee, e problema ta bahando y no tin un keho oficial riba esey, pero den futuro tur cos lo wordo digitalisa. Digitalisacion ta drentando y e ta haci e trabao mas facil.
El a agrega cu e nuebe persona cu lo drenta tambe ta bay yuda nan. Alfonso Tromp a comenta cu TOPA tin un super bon relacion cu e hefe di Imigracion, señor Hoo, y tur biaha cu e sindicato a acerk'e, el a duna su cooperacion y e tin entendi, di parti di su empleadonan cu ora nan tin cierto preguntanan y remarca, nan ta acerca señor Hoo y e ta duna nan cooperacion tambe. Pa conclui e tema aki di parti di e presidente di Topa, el a bisa cu en general e no a haya e impresion cu cos ta malo na Imigracion, y mas bien su delegado, señor Martis, ta contento.
