Marilyn Wout, PR, a splica:
ORANJESTAD (AAN) – Marilyn Wout, Relacionista Publico di Departamento di Integracion y Maneho di Stranhero, a informa tambe cu den e maneho nobo di DIMAS tin diferente categoria cu por pidi permiso pa mas aña, por ehemplo pa director, rentenier, permisonan cu tin di haber cu deporte sea e atleta of sport coach, inversionista, pensionado, studiante, 'verblijf bij partner', y permisonan di famia dependiendo di cual situacion. Esakinan ta casonan unda na momento di renova e peticion di permiso, lo por pidi entre un cu cinco aña.
DIMAS ta recomenda tur persona cu si ta cay den un di e categorianan menciona, por fabor pidi un permiso entre un pa cinco aña y e lo ricibi un orden di pago corespondiente na e suma pa e cantidad di aña, y e ora ey lo no mester renova e permiso cada aña.
“Reunificacion familiar tambe ta posible cu e prome permiso; si un garante ta un persona cu tin un prome permiso y e ta desea di trece su casa of su yiunan menor di edad tambe ta posible y por haci esaki semper cu e cumpli cu e norma di entrada, cu ta 2040 florin pa luna”, Wout a splica.
Marilyn Wout a agrega cu DIMAS tin dos producto nobo tambe cu ta e Digital Nomad. Esaki ta un persona cu ta bin Aruba y ta bay traha remotely, via laptop, pa un compania cu ta den exterior. Wout a indica cu esaki ta un permiso cu DIMAS ta mirando cu tin un trend p’e, cu ta wordo pidi, y nan tine aworaki tambe, y cu por wordo pidi den e portal.
El a agrega cu un persona cu ta bin pa traha y ta trece su famia di biaha, e peticion di permiso di e garante mester keda cla prome pa asina e por inscribi y para garante pa su famia.
