ORANJESTAD (AAN) – Magaly Maduro, Director di Fundacion contra Violencia Relacional, a duna su punto di bista tocante su reunion cu Formador Evelyn Wever-Croes, den e contexto di formacion di gobierno nobo.
Magaly Maduro a expresa cu e Fundacion ta sumamente contento cu e oportunidad cu nan a haya di bay den combersacion hunto cu Formador, pasobra nan ta forma parti di nos comunidad y mirando con e cifranan di violencia relacional ta aumentando aña pa aña, ta hopi importante pa dune atencion den e cuater añanan nos dilanti pa por yuda nos hendenan, pasobra finalmente e ta bay over di nos poblacion.
Magaly Maduro a menciona cu nan a toca diferente punto importante pa e fundacion y un di nan ta cu e fundacion a expande, y aworaki ta conta cu 22 unidad.
“Esaki ta bay tin extra costo y nos tin cu bay on cu esaki. Tambe nos a papia di e diferente personanan cu nos ta yuda y e 357 persona cu a haya ayudo cerca nos aña pasa di cual siete tabata hende homber. Den e proximo añanan tambe nos kier duna atencion na hendenan homber, pa nan tambe haya opvang; pasobra loke ta pasando aworaki ta cu nos tin 22 unit solamente pa hende muher y nan yiunan, y nos sa, den nos data base, cu tin hende homber tambe cu tin necesidad di haya opvang.
Esaki ta un punto cu nos a nombra como Fundacion. Nos a papia over di e problema di vivienda cu tin na Aruba, pasobra un bez cu e señoranan aki sali for di nos opvang nan tin cu bay busca nan mes apartamento y e prijsnan riba mercado ta hopi caro; pues, nos ta wak esaki un punto cu mester traha riba dje y vivienda na Aruba en general”, Magaly Maduro a señala.
E fundacion ta conciente cu tin hopi problema door di e pandemia cu ta un ola cu no a pasa ainda. “Nos a haya hopi cliente aña pasa, y nos ta mirando esey tambe. E aspecto financiero ta keda un problema pero danki Dios, economia ta drechando, kiermen esey no por ta un motibo pa nos haya violencia. Pero e lo ta hopi eroneo di mi parti pa pensa cu solamente placa ta e motibo cu tin violencia domestico. E ta un materia hopi mas compleho, y tin hopi mas cos cu ta hunga un rol, y di tur esey nos a papia un rato pasa tambe cu nos mester adresa tur e puntonan ey”, Maduro a indica.
El a agrega cu e grupo meta aworaki, si mester wak con pa deal cune, pasobra hende homber mester di opvang y nan no kier pa nan ta hunto cu e clientenan femenino. Kiermen, mester busca un opvang apart na otro caminda pa hende homber.
