Michella Steenvoorde-Laclé, Director Plan di Mayor:
*Mescos cu mayor traha nan plan yiunan tambe ta traha nan plan
ORANJESTAD(AAN)-- Den entrevista cu Matutino DIARIO, Director Plan di Mayor, Michella Steenvoorde-Laclé, a trece dilanti cu mester corda cu e Ley Plan di Mayor (Bevordering Voortgerzet Ouderschap en Zorgvuldige Scheiding) a bay na vigor dia 1 di Maart 2024.
Esey kiermen cu na October 2023 (e ultimo lunanan di 2023) a cuminza cu e pilot pa intervencionnan cu lo tabata mara na e ley.
Esaki ta dos, tres of cuater intervencion pa mayornan, dependiendo di e grado di conflicto cu e mayornan ta den dje, ora cu nan a bay separa.
“Nos semper a pensa cu plan di mayor mester ta un aanpak holistico, no solamente e mayornan tin cu haya un guia, pero e muchanan tambe. Den e ley, nos a skirbi cu e muchanan mester wordo scucha, pasobra nos a firma e ‘Verdrag Rechten van het kind” y na 2021 Aruba a ratific’e. Anto e articulo 12 ta bisa cu e mucha mester wordo scucha, anto den nos Ley e mucha ta wordo scucha desde su 12 aña door di e rechten. Pero na Plan di Mayor, nos ta scucha e muchanan desde Kleuter. Nos a wordo entrena pa papia cu e muchanan, anto door di e combersacion ey nan ta traha nan kleuterplan, nan kindplan, of nan jongerenplan. Mescos cu e mayornan ta traha nan plan di mayor, e muchanan tambe ta traha nan plan. Anto e muchanan ta bisa nan mayornan, e ora ey, nan deseonan pa cu nan separacion”, Steenvoorde- Laclé a señala.
Michella a menciona cu por pensa cosnan manera: “Mi no kier pa mami cu papi pleita dilanti mi” of “Si mi haya un regalo di mami lo mi kier hiba e regalo aki na papi su cas” of “Ora mi ta keda drumi na papi, mi kier tin un potret di mami den mi camber”...cosnan asina. Naturalmente, muchanan por tin nan deseo pero ta e mayornan ta tuma e decisionnan, pero alomenos, mayornan mester tuma na consideracion e sentimentonan di nan yiunan den esaki”, Michella Steenvoorde-Laclé, Director di Plan di Mayor a relata.
