Un gobernante conciente ta tuma medida na bienestar di hende -- Duna direccion na un Pueblo den e fase transitorio pa futuro -- Cigaria ta parti di placer cu a bira tragedia personal pa hende
ORANJESTAD(AAN)- Manera DIARIO a sostene for di momento cu a cuminsa papia di recuperacion di e Pandemia Covid-19, e normal nobo cu mester wordo construi, mester contene ingredientenan cu prome cu Covid-19 ya a bati na porta.
Siglo 21 a habri cu un reto grandi pa gobernantenan cu mester a duna contenido real na e concepto di un gobernante, cu mester ta e dirigente di un Pueblo.
Cu otro palabra, un gobernante conciente ta mustra Pueblo riba peligernan cu placer ta contene tambe y ta scrap loke ta peligroso pa hende.
Cu esaki lo bira e reto grandi pa Siglo 21, ya tabata conoci pa expertonan y sigur pa cientificonan cu a mira con hende a hinca mundo den awa bruto na Siglo 20.
Aña 2000 no a bira e cohete di desastre cu mundo a teme y segun teorianan lo a destrui e avance tecnologico logra na Siglo 20 den cual hende a perde nocion di realidad.
Aña 2000 mundialmente a bira inicio di e temporada den cual mundo mester a bandona awanan turbulento cu a wordo causa dor di inventonan y tur loke tabata resorta bou e e nomber di “moderno”.
Liderazgo tabata e exigencia principal di Siglo 21, cu tabata exigi politiconan cu no tabata mira cuanto voto nan por a haya pero na prome lugar con nan ta stabilisa futuro y cu responsabilidad duna direccion na hende.
Cambio di clima, lucha contra cancer y otro enfermedadnan, e lucha contra droga y alcohol, tabata palabranan cu a acentua e agenda di lidernan real.
Ta cu berdad den man mester analisa politiconan cu Siglo 21 a produci te awor. Ta a base di e normalisacion di un mundo cu a perde direccion na Siglo 20, DIARIO ta cualifica lidernan cu mester dirigi Aruba.
October ta conduci 2021 pa su fin y ta habri porta pa loke ta conoci como final di aña.
Mas cerca yega di November, mas Aruba por a tuma nota di loke ta liderazgo cu pa DIARIO ta marca di Prome Ministro Evelyn Wever-Croes cu mester duna guia na Aruba den un lama sumamente peligroso.
Prome Ministro Wever-Croes ta destaca como gobernante, cu no ta core tras di popularidad y ta hustamente esaki a haci cu Pueblo a entrega su confiansa pa Wever-Croes sigui goberna Aruba.
Final di 2021, ta habri porta pa un futuro cu normanan nobo cu mester sirbi hende y proteha hende den peligernan grandi pasobra hasta naturalesa ta presenta e pakete peligroso di “cambio di clima”.
Evelyn Wever-Croes ta bini dilanti pa su liderazgo pa motibo di su actitud, cu no ta basa riba gana contest di popularidad pero obviamente na papia y actua a base di berdad y na interes di un futuro nobo.
Gasta placa sin reserva, a yega na un fin. Pueblo a bira conciente cu mester saca Aruba for di e calamidad financiero cu tabata realidad di Aruba for di 2014.
Evelyn Wever-Croes mester a kita libertad for di ciudadanonan cu Toque de Queda pa asina scapa bida y haci posibel pa comunidad por a drenta inicio di normalidad na un forma responsabel.
Awe Gabinete Wever-Croes ta trata cigaria, como loke cigaria ta, cu ta enemigo di hende cu ta causa morto.
Gabinete Wever-Croes ta defende e cantidad di ciudadanonan cu no ta huma pero ta bira victima di hende cu ta huma.
Den un lama peligroso, Prome Ministro Wever-Croes y su gabinete no ta pisca popularidad pero e rumbo di un normal nobo, cu hende a kibra na Siglo 20 y pa cual awe hende ta enfrenta e reto tremendo di sobrevenvia.
Na e momentonan historico cu mundo conoce actualmente, DIARIO tin e deber periodistico di bisa Pueblo kico ta bon y kico mester sostene pa Aruba, pa mundo sobrevivi e lama bruto di realidad actual cu ta duna un contenido nobo y responsabel na placer, ta sostene e balor di compasion y di convivencia humano, y ta lucha contra problema, morto y dolor di e ser humano.
Liderazgo real ta haya contenido pa Aruba por subi e caminda di futuro, cu lo mester debolbe na hende normalidad humano, den cual democracia ta bira realidad.
