Parlamentario Misha Raymond:
*Nan ta sinti depresion, ansiedad y ta experiencia racismo!
ORANJESTAD (AAN) – Den conferencia di prensa di RAIZ, di parti di su fraccion Parlamentario Misha Raymond a dirigi su participacion contestando preguntanan di miembronan di prensa.
Den esaki, el a referi na kico ta pasando cu studiantenan Arubano na Hulanda, basa riba loke el a mira durante e Reunionnan di IPKO, den cual el a participa, recientemente.
E parlamentario a trece dilanti cu no ta secreto cu nos studiantenan na Hulanda, ta pasando den duro. El a indica cu tabata tin un rapport di Ombudsman cu a indica esaki tambe.
Locual el a haya great ta cu e biaha aki na IPKO, a invita studiantenan pa papia cu e Parlamentarionan unda un grupo di 25 studiante, entre nan di Bonaire, SABA, Curacao y Aruba. E preocupacion cu nan tin ta grandi, entre otro pa vivienda, y un punto cu a bin hopi dilanti ta nan salud mental.
Esaki tabata un tema di discusion cu no solamente studiantenan di Aruba a indica, pero tambe tur e demas studiante presente.
“Nan ta atende cu aspectonan manera depresion, ansiedad, racismo cu nan ta experiencia ayanan. Nos tabata tin combersacion cu nan, y loke nos a papia cu e studiantenan y loke a sali den e rapport tambe nos por a sigui dialoga cu e coleganan di Hulanda tambe. Nos a bisa nan cu tin cierto aspectonan di maneho cu mester haya prioridad pa nos muchanan di Reino cu ta bay studia na Hulanda”, Parlamentario Misha Raymond a señala.
E dama a comenta cu e palabra “uitwonen” a bin hopi dilanti, pasobra pa un studiante Hulandes ta nifica cu nan ta sali for di cas di nan mayor cu por ta un stad un tiki mas leu cu nan Universidad, pero pa esnan di Aruba of di otro paisnan di Reino, uitwonen cu nan ta laga nan pais pa bay biba na otro pais, anto cu esey ta bin no solamente hopi preocupacion, pero e ta trece cu ne un sensitividad pa nos studiantenan, con pa atende cu cierto retonan cu nan tin na Hulanda.
“Pues un dialogo a wordo habri. Studiantenan a papia cu nos, no solamente cu nos como representantenan di e Islanan di Reino, pero tambe cu representantenan di Eerste Kamer y Tweede Kamer. Y nan tabata basta enfoca den kico ta pasando”, Parlamentario Misha Raymond, di fraccion di Raiz a señala.
