ORANJESTAD (AAN) – E director di Departamento di Asunto Social, señora Glenda Hernandez, a elabora den conferencia di prensa tocante su reunion cu Formador Evelyn Wever-Croes, den cuadro di e Social Crisis Plan y cual ta e aspectonan riba cual a delibera.
Glenda Hernandez a bisa cu e reunion a bay bon hopi bon y fructifero, den sentido cu tur e lidernan di proyecto cu ta parti di SCP a duna un presentacion di locual nan ta bezig cune.
Hernandez a duna di conoce cu SCP no ta bezig mas cu 31 plan manera a cuminza, pero nan a avanza na un nivel di programa. Nan ta bin cu cierto servicionan cu nan kier pa bira duradero.
“Nos ta papiando di un Centro pa Hoben y Famia, cu ta algo accesible pa mayornan, pa yuda nan den nan habilidadnan: desaroya nan habilidadnan con pa anda cu mucha; nos ta papiando di un Centro di Experticio pa mucha y hoben, locual internacionalmente ta wordo boga pa bin cu e centro ey unda nos ta pone tur experticio y conocemento hunto, pa asina nos por train nos profesionalnan den veld, nos por wak e leynan cu ta bin na vigor pa interes di e muchanan. Nos ta papiando di e ley di crèche, di proteccion di mucha den e codigo di proteccion; nos ta papiando di e ‘ouderschapsplan’ ora cu tin divorcio. E centro ey mester bay vanguardia e leynan aki, y zorg pa nan wordo implementa den veld. Nos mester di esey pasobra Asunto Social ta hopi grandi, nos mester di un atencion special pa mucha y hoben, y esey a wordo boga pa organizacionnan internacional, pa añanan, y nos a bin cu esey”, Glenda Hernandez a subraya.
Tocante e Centro pa Hoben y Famia, director di DAS a expresa cu awo un mayor no mester di cana di cashi pa muraya, rondia un servicio cu tin mester, pero ta drenta den e centro na Wayaca, y e ta wordo yuda.
Hernandez a agrega cu otro servicio cu nan ta bin cune ta e “Family Justice Center” pa e victimanan sea mucha, hoben of mayornan ora cu nan wordo maltrata.
“Violencia ta hopi presente den nos comunidad. Si bo ta wak e cifranan di Sociaal Psychiatrische Dienst, 43% di 296 denuncia cu a drenta na 2020, ta di violencia fisico, sexual y tambe ora cu tin adiccion ta bin violencia na cas”, Hernandez a señala.
El a subraya cu esaki no kiermen cu DAS no a haci nada. Violencia ta algo cu ta disparce di un dia pa otro, pero mester traha na dje.
“Kico ta Family Justice? Cu nos ta acumula informacion. Nos ta laga OM, Polis, Hospital, cu Asunto Social traha hunto bao un dak pa wak e casonan, pa nos por haya tur e evidencianan pa asina por yuda e victima miho”, director di DAS a menciona.
Otro aspecto cu a wordo papia cu Formador, ta e violencia na scol. Hernandez a bisa cu problemanan social na scol ta hopi y scol ta bisa cu nan tin hopi trabao caba pa duna enseñanza na e alumnonan, segun curriculum, pero aworaki tambe nan tin cu duna atencion na e problemanan social. “Nos tey pa yuda nan cu e problemanan social, nos a di hacie caba; nos a yuda como 59 famia y nos ta sigui yuda y trata di soluciona nan”, Glenda Hernandez a subraya.
