Monique Giel, profesional di WGK:
*Y vooral den carnaval!
ORANJESTAD (AAN)—Den entrevista cu Monique Giel, Profesional di Wit Gele Kruis, el a expresa cu den su departamento nan ta papia cu mayornan, y duna nan conseho pa papia cu nan yiu, splic’e riba e consecuencia cu consumi alcohol of droga ta trece p’e.
Esaki pasobra e edad entre dies pa dieseis aña ta un hopi vulnerabel pa alcohol y droga, y vooral carnaval. “Den nos practica, nos ta ripara cu muchanan ta cuminza experimenta cu alcohol of cu droga pa prome biaha”, Monique Giel a relata.
El a agrega cu si un mayor no ta papia cu su yiu riba e temanan cu nan por topa cu ne, pasobra nan no ta consciente di e peligro eyfo, e mester busca instancianan pa yud’e cu esaki.
“Pasobra, nos ta ripara tambe cu muchanan na momento cu bo ta bay papia cu nan, nan ta bisa ‘si mi mayor ta streng, no ta laga mi bay ni un caminda’. P’esey nos tey, y nos ta guia bo con bo por bay ‘onderhandel’ cu bo yiu. Bo ta pone un limite, bo ta pone bo reglanan. Ora cu bo yiu kier bay wak un actividad, por ehemplo, di carnaval, lag’e wak cu bo ta interesa den kico e ta haci, den ken ta su amigonan, cu ken e ta bay, y semper ora cu e ta bin bek semper combersa bek cu ne con a bay. Of durante cu e ta den e actividad, bo ta puntra bo yiu si tur cos ta bayendo bon. Contact’e, yam’e”, señora Giel a señala.
Hopi biaha e muchanan ta bisa cu nan mayornan ta streng, pero na final nan ta keda contento toch cu nan a pone atencion riba nan. “Mi mayor ta yama mi. Eyan ta unda nan ta bin bij y nan ta pensa riba e reglanan, y riba e limite cu bo palabra cu ne, y tambe ta importante pa dirigi bo yiu riba un comportacion positivo”, Monique Giel a enfatiza.
Pakico? Pasobra ora nan tin un comportacion negativo nan por cay den man husticia, of nan ta bebe asina hopi cu nan a bay den overdosis, of nan a trece problema pa nan salud y eynan bo tin cu preveni. “Door di papia cu nan, duna nan tips, y mustra nan riba situacionnan cu por pasa, eynan e mucha ta sintiendo bon pasobra ‘mi mayor kier mi’. Laga bo yiu sinti cu bo tey p’e na momentonan cu ta dificil”, Monique Giel, di WGK, a subraya.
