ORANJESTAD (AAN) — Minister Xiomara Maduro, den conferencia di prensa a indica,
cu na dado momento na aña 2020 e debe di Aruba tabata mas grandi cu nos pais su economia, pero despues, poco, poco a bin un recuperacion di e economia.
E linea cora poco, poco a subi y a keda mas parallel pero ainda Aruba no ta den e situacion unda cu su economia a recupera suficiente, unda cu e ta pasa e nivel di su debe.
“Esaki nos ta ilustra pa asina aki tur hende por tin un bista di e severidad di locual ta e pandemia. Pasobra ta berdad, si nos ta wak pafo di e bentana, Aruba a keda intacto, e economia di Pais Aruba a keda intacto; yudanza a wordo brinda na ora na 2020 y 2021. Nos pais por a recupera pero e recuperacion ainda no ta suficiente, pa e ora ey nos por bisa cu nos a yega na nivel di 2019. Y esaki ta trece cune, un cambio grandi tambe pa loke ta e situacion financiero di Pais Aruba, y hunto cune tambe e normanan di locual nos tin cu atene nos mes cual ta e parti di supervision financiero. No ta asina aki cu tin un ‘free for all’ pero a keda contene e deficit pa asina por contene e crecemento di debe, pero e efecto teynan y esey ta locual nos ta trahando pa maneha”, Minister Xiomara Maduro a señala.
E dignatario, basa riba graficonan a mustra cu e debe ta core den 4 billion florin na 2012 y eynan por wak cu den apenas den dos aña ta bin acerca 1.482 miyon florin. E debe ey cu a wordo acumula tabata pa Aruba como pais, por a conserva su economia, brindando mas di 700 miyon florin y esaki tabata necesario pa mantene e economia di Aruba, segun e mandatario a splica.
El a agrega cu den e tres añanan cu a transcuri, Aruba a perde 834 miyon florin, na entrada. Pues, e entrada cu nos ta custumbra di haya cada aña, si por tuma nan tur hunto por wak un average pa aña cu Aruba a keda sin haya 278 miyon florin. “Pues den e tempo tras di nos, a suma 834 miyon florin, cu Aruba a perde di haya door di e hecho cu nos a perde parti di nos economia”, e dignatario a indica, y a reitera cu Aruba ta recuperando pero no ta na e nivel cu nos pais tabata prome cu e pandemia. Esaki ta e efecto di e pandemia.
