Segun consumidor local: - ORANJESTAD (AAN) – Tin indicacion cu siman pasa y e siman aki, tin cantidad di turista cu ta drenta cumpra den e supermercadonan grandi, y nan ta bin den grupo.
No obstante cu nan no ta wordo permiti drenta sin tapaboca ainda, aworaki esnan cu ta bin hunto no mester coi mas di un garoshi; un mes ta suficiente, y segun opinion no ta bon pa haci comosifuera Covid a bisa ayo na Aruba y resto di mundo pasobra esey no ta e caso.
Clientenan ni local ni bishitante ta wordo pidi, alomenos, pa mustra cu nan ta totalmente vacuna, y aunke tin marca e distanciamento social ainda, un bez paden e consumidornan ta pasa di hang pa hang manera nan ta haya ta bon, y hasta ta para meymey papia den grupo, manera nada a sosode cu ainda mester cuida.
Solamente den un supermercado grandi ainda ta conserva e regla di tuma temperatura na cada cliente, pero e resto no tin esey mas. Den supermercadonan den distrito, por ehemplo, ya no mester uza ni garoshi grandi si ta poco cos tin pa cumpra, y por uza e macutonan chikito cu no ta percura pa ningun distancia entre un y otro cliente.
Tin hende cu ta pensa cu suaviza tanto e medidanan ta un poco prematuro y nan mes no ta confia, y nan ta haya cu mester tin mas precaucion ainda den e negoshinan tur.
