Minister Wever aclareando introduccion di media verordening:
ORANJESTAD (AAN): Minister di Asunto Economico, Comunicacion y Desaroyo Sostenibel, Geoffrey Wever durante un entrevista na Telenoticia, a referi na e 'Mediaraad' y 'Media verordening' cu kier introduci.
Wever a splica cu den su opinion, e discusion riba esaki a wordo saca un poco for di contexto. E tema aki a bin de cuadro di menazanan cu a keda haci publicamente y esaki basicamente ta pone e hecho cu pa locual ta e contenido over di e mediaraad pa bin c'un legislacion cu ta trata media.
Awor ta bin cu e impresion cu pa medio di esaki ta aumenta e poder politico y cu lo kier silencia media locual no ta e caso, e mandatario a enfatisa.
"No por ta e caso pasobra media ta sumamente importante den un estado di derecho. Mi ta kere nos tur ta reconoce esey y libertad di prensa ta algo esencial", a expresa.
Minister Wever a agrega cu e kier trece claridad riba esey ya cu absolutamente no ta e caso cu kier censura media. Media ta importante."Nos ta respeta e libertad di media y libertad di expresion, derechonan fundamental.
No mester pone e expresionnan ey pafo di contexto of contenido pasobra e no ta na su lugar, a bisa.
Ora cu kier papia di un mediaraad mes, tin un concepto di un ley caba cu a wordo prepara door di expertonan pa hopi aña caba. E ta un discusion cu pa hopi tempo ta wordo hiba caba door di diferente profesional y a prepara den pasado un media 'verordening' unda ta incorpora un stichting, cu ta e mediaraad y den esaki ta bay haya hendenan independiente. Dus, no ta haya ningun tipo di influencia politico, Wever a splica.
Awor ta wordo presenta comosifuera cu gobierno lo kier aumenta su poder riba media y esey absolutamente no ta e caso pasobra den e mediaraad, politica no ta bay tin ningun influencia pasobra esunnan cu ta wordo nombra den e mediaraad, e presidente ta un persona independiente, un hurista.
A agrega cu cada media ta haya un representante den e mediaraad aki, cu ta wordo proponi door di nan mes. Ta bay tin un persona cu ta bay representa e organisacion di consumidor pasobra e mediaraad ta bay tin como tarea, entre otro, pa establece un 'codigo di periodismo'.
"Nan mes ta hacie. No ta suheto na aprobacion di politica, no ta minister ni gobierno ta dicidi ken e personanan ta y tampoco con e contenido di e code ta bay ta. Ta media mes ta dicidi kico nan ta pensa cu ta e nivel di media", Minister Wever a duna di conoce.
