ORANJESTAD (AAN) – Juffrouw Mariela Carrion, Docente di Papiamento na Filomena College MAVO, durante e conferencia di prensa yama tocante e celebracion di e di 75 aniversario di e scol,
a elabora tocante otro evento cu ta un 'Nacht Museum'. E docente a menciona cu no ta prome biaha cu nan ta organiza un 'Nacht Museum'. Nan a hacie un bez caba pero e dos añanan siguiente no por a haci pa motibo di Covid-19 y tur e reglanan envolvi, entre otro, no aglomeracion.
“Nos a djis hacie den scol so, cu e muchanan mes pero no tabata tin exposicion. Pero e aña aki cu tur cos a habri bek, nos a bisa cu awor si nos ta bay completamente cu nos nacht museum. E ta bay ta dia 1 di Juli, na scol mes di 6or di atardi pa 9 or di anochi”, Juffrouw Carrion a indica.
KICO E TA ENCERA:
Carrion a splica kico un 'nacht museum' ta encera. El a menciona cu pa tres materia di eerste klas, e muchanan mester busca un personahe cu a haci influencia riba e comunidad di Aruba, of San Nicolas. “Nan mester haci un entrevista cu e personahe, y despues di esey nan mester traha un relato, haci un presentacion y e anochi ey nan ta haci e exposicion di e personahe. Hunto cu esey, e muchanan di tweede ta haci presentacion di cuminda di un pais di Caribe, y anochi ey nan ta bende e cuminda ey den tent”, e docente a splica. E alumnonan tanto di eerste como di tweede ta haya un cifra pa nan presentacion.
El a agrega cu, ademas di esey, e alumnonan di derde ta duna diferente tipo di show, cual tambe ta wordo evalua pa un cifra final.
Juffrouw Carrion a comenta cu e prome biaha cu nan a organiza un 'nacht museum' e tabata un exito rotundo, e lugar tabata totalmente yen. E tempo ey nan tabata tin diferente personahe. Pa e aña aki tin Rocco, Ataniro, Gario, y tambe personanan cu ta eherce otro tipo di influencia den e comunidad manera Dufi Kock cu ultimo dianan a haya un condecoracion real, tambe tin Diana Antonette pa su trayecto largo den e mundo di baile. Pues, nan tin varios personahe di San Nicolas y henter Aruba.
“Esey yama ‘Di generacion pa generacion’ pasobra nos ta papiando di hendenan di edad respeta te cu esnan mas hoben, pasobra nos kier reconoce nan tur pa e trabao cu nan tin den comunidad, tambe”, Juffrouw Carrion a duna di conoce.
