Na Vader Piet a entrega Aruba e prueba di esclavitud moderno
*Casonan di corupcion ta splica con hende ta bira esclavo
*Cuanto hende ainda ta paga e prijs di no acepta ser esclavo?
ORANJESTAD(AAN)—Pa loke a pasa den pasado por tin balor pa nos awe y den futuro, mester tin rechaso no solamente di loke a tuma lugar ayera pero na prome lugar prueba, con nos mes na e momentonan aki ta nenga di haci otro nos esclavo of ta nenga di ta esclavo.
Hende tin e tendencia di scapa nan mes dor di huy den tempo of espacio.
Ora nos papia di esclavitud, nos kier bolbe na un pasado den cual benta di hende tabata parti di cultura comercial acepta na nos pais of paisnan cu cual nos ta atende.
Nos no kier ocupa nos mente cu esclavitud ta un concepto eterno di hende, cu mester destrui libertad y derechonan total di hende como hende, pa mam ganashi.
Pa mira kico ta un esclavo, nos mester stop di uza historia na un forma exclusivo y mira con na e momentonan aki, nos dilanti esclavitud ta presente y kico ta e elementonan cu ta produci esclavitud, cu ta deshaci di tur derecho di un hende, cu ta perde su legitimidad como hende.
Na Aruba den Corte di Husticia na varios momento Hueznan a pronuncia sentencia cu mester a evita cu hende por wordo usa como esclavo na momento cu e bende su mes, su derecho of su concenshi.
Algun siman pasa Aruba a conoce e realidad horibel di e forma con hende a perde nan bida ora un barco a naufraga na Vader Piet y hende hunto cu e droga cu e mester a transporta, a yega costa Arubano morto of bibo.
Na e ocasion DIARIO a lansa e pregunta, cuanto ya hende a perde tur nan valor humano y nan bida na man di e dictador Nicolas Maduro, uno di e hopi dirigentenan di paisnan cu ta wordo dirigi dor di dictador, cu cambia henter un poblacion den su esclavonan cu mester haci y deshaci ora e kier?
Cuanto pais na mundo no ta wordo dirigi dor di dictador? Cuando hoben na por ehempel Rusia, realmente kier bay bringa na Ukraine pero como esclavo di e sistema Comunista no tin opcion?
Nos ta bolbe Aruba, den un situacion cu no ta hiba nos costa pero ta hiba nos sala di Corte di Husticia.
Durante ultimo eleccionnan pa Parlamento y asina pa yega na un Gobierno pa Aruba, por mira cu Huez a nenga e peticion di AVP pa e ricibi tur informacion di personanan cu mester bay vota.
Huez a basa su mes riba su deber pa proteha e forma democratico, liber y sagrado cu Aruba conoce pa eligi su gobernacion, den cual compra di voto por conduci directamente na un relacion corupto entre e persona cu ta vota y e partido cu ta yega na mando.
Durante casonan cu a wordo trata den Corte, manera e caso Avestruz cu a produci un sentencia di prison pa Benny Sevinger, por a mira e forma cu placa ta mara un politico cu tabata gobernante, na family friends.
Den un relacion corupto, un pais ta wordo destrui dor di e politico cu ta ricibi placa pa permiti otro hende haya, loke e politico no tin derecho pa bende sin sigui e ruta normal.
Corupcion ta encera cu un persona ta bira esclavo di hende cu ta deshaci di su libertad, ta bende su mes pa placa of otro valor pa asina comberti su mes den esclavo.
Na momento cu corupcion hisa su bandera, un comunidad hasta sin cu e ta na haltura, por wordo uza como fuente di armanan pa destrui un persona, cu ta nenga di bende su mes y ta nenga di bira esclavo di corupcion.
Ta di aprecia cu Rey Willem Alexander a pidi disculpa pa e epoca di esclavitud.
Constitucion di Aruba ta prohibi benta fisico di hende como esclavo. Constitucion di Aruba ta prohibi benta mental y emocional di hende como esclavo.
Mundo no conoce esclavo mas? Mundo moderno no conoce esclavo, mientras muher mester bira prostituta pa e no wordo mata?
Mundo no conoce esclavo, mientras hende ta wordo uza pa comercio clandestino, pa e lucha scondi di poder?
Mundo no conoce esclavo den e tempo cu mas esclavitud ta pronuncia su mes pa medio di moda, forma di biba, comunicacion moderno?
Nero a bira e Emperador Romano cu a splica mundo kico ta esclavo. Hende a perde tur nan balor pa Nero por a disfruta di situacionnan di horor den cual hende tabata wordo confronta cu crueldad. Na final el a kima Roma y fiesta a termina.
Awe cuanto hende ta esclavo fisico of mental?
Concenshi ta e arma contra esclavitud. Concenshi cu mester ta liber pa e por funciona sin yama danki forzosamente pa asina sigui gosa di fabor cu no ta merece of hasta castigabel.
