Dr. Wilmer Salazar, Consehero Medico di DVG
ORANJESTAD (AAN) – Docter Wilmer Salazar, Consehero Medico di DVG, den entrevista cu DIARIO a amplia tocante e malesa Hepatitis Agudo infantil, cu ta afectando muchanan na diferente pais na mundo.
¿Cua ta e situacion rond mundo y Aruba?
EUROPA:
“Cifranan duna door di Organisacion Mundial di Salud (OMS) y e Centro Europeo pa Control y Prevencion di Malesanan (ECDC na ingles) ta indica un cantidad di 232 caso di Hepatitis Agudo di Origen no conoci, cu a cuminsa na Inglatera y despues a extende pa 14 pais, den region Europeo. Mayoria mucha a recupera, pero tin algun cu ainda ta bao cuido medico, 6 a haya transplante di higra y un a muri. Edad di esnan afecta ta varia entre 0 pa 16 aña y grupo di edad mas frecuente (75,9%) ta entre 2 pa 5 aña”, Dr. Salazar a informa.
Casonan registra den paisnan europeo (Januari – Mei 2022):
"Belgica (12), Chipre (2), Dinamarca (6), Grecia (dos), Irlanda (6), Italia (24), Hulanda (6), Noruega (5), Polonia (1), Serbia (1), Slovenia (1), Spaña (26), Suecia (9) y Inglatera (131).
MERCA, LATINOAMERICA Y CARIBE:
MERCA:
6 di mei 2022, CDC na Merca a notifica cu den e ultimo 7 lunanan tin 109 mucha bao investigacion, cu hepatitis di origen no conoci distribui den 25 estado y teritorionan mericano, incluyendo 5 morto. Algun di nan a haya transplante di higra.
LATINOAMERICA:
Segun medionan di prensa, Argentina a reporta 13 caso sospechoso di hepatitis agudo di origen no conoci den mucha.
Autoridadnan di e Ministerio di Salud di Brasil a informa cu nan ta monitor pa lo menos 28 caso probable di hepatitis agudo infantil di origen no conoci. Corantnan di Mexico a publica cu autoridadnan di salud na Mexico ta monitoreando 21 caso di, probablemente, hepatitis infantil agudo di origen desconoci.
CARIBE:
Te na e momentonan aki den e region Caribe incluyendo Aruba no a keda reporta NINGUN caso di hepatitis agudo di origen no conoci, den mucha”, Dr. Salazar a menciona.
DVG A ALERTA DOCTERNAN:
Dr. Wilmer Salazar a duna di conoce tambe cu DVG desde principio cu e noticia di e malesa aki a wordo publica rond mundo, a alerta tur docter di cas pa si encase nan ta registra un caso, raporta esaki na DVG mesora. E ta reitera cu te ainda den Caribe incluyendo Aruba no a detecta ni un caso di Hepatitis Agudo Infantil di origen desconoci.
Den un di tres articulo, dr. Wilmer Salazar ta conclui cu e informacion interesante aki.
