ORANJESTAD (AAN): Ronella Croes, CEO di ATA a indica durante conferencia di prensa di Crisis Team, cu desde siman pasa, CDC na Merca a cambia e nivel di risico pa Aruba na nivel 4.
Esaki ta nifica cu mericanonan ta wordo aconseha pa bo biaha pa Aruba. Siman pasa nan tambe a bisa cu Aruba por tabata sperando entre 90 mil pa 94 mil bishitante den luna Augustus. Sin duda e ola actual di casonan positivo, cu ta mara na variante Delta, como tambe na esnan cu no ta vacuna, lo tin su impacto riba recuperacion turistico y economico.
Segun Croes, 'dicho hecho'. ATA a ahusta nan proyeccion pa luna di augustus y nan ta premira un total di 85 mil bishitante. Apesar cu e cifra ta sona impresionante, pero mester tene na cuenta cu den lapso di 1 siman, nan tabata spera un cantidad di 90 pa 94 mil bishitante y awo nan ta papiando riba 85 mil bishitante pa luna di Augustus.
Segun Croes, mas cu claro e tendencia aki no por continua. Si cada siman mester kita e cantidad grandi di bishitante, e ta algo cu Aruba no por carga. ATA ta anticipa cu e impacto di e ola di Covid actual lo afecta resulta di lunanan di September y October tambe. Nan ta spera cu pa luna di November Aruba por ta riba un trayecto di recuperacion cu nan a premira te cu luna di juli. Esaki ta nifica cu e porcentahe di recuperacion cu inicialmente nan a premira tambe ta bay baha. Ultimo grado di recuperacion pa aña 2021 tabata cu Aruba por a cera e aña cu un recuperacion di 76 porciento compara cu aña 2019.
ATA lo sigui monitor e situacion, pero nan ta kere cu e cifranan aki, specialmente e impacto di e lapso di un siman riba cifra y resultado di luna di augustus.
El a agrega tur hende ta conciente cu e yabi pa recuperacion ta simplemente vacunacion. Un 29 porciento di populacion riba 18 aña cu no ta vacuna. E mesun 29 porciento aki ta impacta mas di 80 porciento di hospitalizacion, ocupacion den ICU y morto.
Cifranan ta papia riba nan mes, y nos tur por haci di nos banda pa convence esnan cu no a vacuna ainda pa haci esaki. E tarea di mas importante ta den mannan di esnan cu no a vacuna.
Ronella Croes a haci un apelacion na esnan cu ainda no a vacuna: No pensa riba bo mes y no laga bo opinion y pensamentonan lidera den momentonan aki, pero pensa riba e impacto cu esaki ta causa pa nos isla. Lo bo sinti esaki den bo cartera, como tambe bo famia, amigonan y comunidad completo lo sinti esaki for di un perspectiva economico, pero tambe di salud. Pone interes di henter un comunidad, interes colectivo, interes general na prome lugar. Ta momento pa yuda Aruba bolbe den trayecto di recuperacion turistico y economico.
