Docente di UA mr. Luciano Milliard:
*Hopi ta duna nan aporte na Aruba y tambe den exterior!
ORANJESTAD (AAN)—mr. Dhr. Luciano Milliard, Docente di FAS (Facultad di Science & Arts) na Universidad di Aruba, a expresa den entrevista cu DIARIO, cu prome cu papia di futuro tin cu papia di pasado, pa referi na e di 35 aniversario di Universidad di Aruba.
“Trinta y cinco aña pasa e idea a naci cu Aruba tin mester di su propio universidad. Si nos wak den e Ley cu ta regarda Universidad di Aruba (e Landsverordening Universiteit van Aruba (LUVA) den e memorie van toelichting ta wordo bisa, cu mester di universidad pa prepara e profesionalnan cu por carga e Pais Aruba, cu a caba di nace dos aña prome cu esey.
“Nos ta hopi contento cu awe cu nos ta celebra e di 35 aña; mas cu 1.500 diploma cu nos a otorga den e añanan aki, hopi profesional cu ta duna nan aporte, no solamente den institucionnan na Aruba, banconan, Belastingdienst, Banco Central, etc., pero tambe pafo di Aruba”, mr. Milliard a duna di conoce.
El a agrega cu na e momentonan aki UA ta preparando un expansion, mas programa pa e hobennan cu tin e deseo di keda na Aruba y busca nan formacion Academico, aki na Aruba mes.
“Nos tambe ta buscando mas institucionnan di afo, partnernan cu ken, si nos por coopera, pa brinda asina mas, na nos profesionalnan. Dus, tin hopi plan! Un cos cu mi kier a menciona ta, si nos wak durante e añanan, nos a pone mas enfasis con nos ta duna e aporte e support na nos studiantenan. Nos a bin cu un sistema caminda nos tin Academic Advisors, cu ta duna aporte na nos studiantenan. Ora cu nan lucha cu diferente desafio den nan proceso aki na Universidad, nos tey pa yuda nan. Si ta cosnan den seno familiar, of financiero, e desafionan, nos tey pa yuda nan. Esey ta algo cu nos a hinca den nos sistema aki na Universidad, durante e ultimo añanan” mr. Dhr. Luciano Milliard a splica.
El a agrega cu mas aun den futuro UA kier support su studiantenan; nan kier pa cada hoben y esun cu tambe cu ta “young at heart” cu ta busca su formacion academico, bin na Universidad, haya informacion. “Nos ta kere cu nos por ofrece tur persona na tur skina di Aruba e preparacion cu bo ta desea”, Milliard a señala.
Finalmente, mr. Dhr. Luciano Milliard a expresa palabranan di danki na comunidad di Aruba, na mayornan y studiantenan cu a kere den Universidad di Aruba, durante 35 aña, a studia y awendia ta profesionalnan aki na Aruba y den exterior.
