Den medio di un crisis di integridad politico un pregunta ta nace
- Scandalnan cu Aruba a conoce ta prueba di sabiduria politico
- Pueblo y su representantenan mester ta uni den balor y norma
ORANJESTAD (AAN)- Aruba ta den un crisis politico sumamente serio.
Despues cu durante Siglo 21 un scandal tras otro a rementa den gobernacion y mundo politico pa ta mas exacto den seno di partido AVP, awe por nota con un grupo ta bini dilanti den intento pa comberti politica den un exclusividad di hende “sabi”pues hende cu educacion halto cu mester dicidi pa e Pueblo cu educacion “menos halto”.
Mientras e berguensa cu AVP bou maneho di Mike Eman a crea pa imagen di Parlamento di Aruba den persona di Benny Sevinger ta destrui e imagen di politica na Aruba den bista di mundo, un percepto completamente eroneo di loke ta spera di un representante di Pueblo ta wordo crea.
Parlamento ta representacion di Pueblo y mester refleha Pueblo di Aruba, cu ta un Pueblo bon educa.
Representacion di Pueblo ta basa riba e realidad cu den Parlamento di Aruba por topa cu e reflexion directo di Pueblo di Aruba, cu a desaroya su mes riba tur tereno.
Na Aruba tin un grupo cu a bay Universidad. Pa nan por a bira loke nan ta, nan tabata tin mester di mayornan cu a stimula nan, un Pueblo cu a permiti nan desaroya nan mes y a haci nan exito posibel.
Esaki ta un hecho tambe cu otro personanan cu a desaroyanan mes riba tereno cu no ta na Universidad solamente pero sigur riba otro tereno cu ta mes valioso cu e titulo universitario.
Pa un pais funciona segun democracia, tur sector di e comunidad mester ta representa den su Parlamento pa asina e voz di Pueblo realmente por resona cu preocupacion autentico di tur ramo di un poblacion.
Pa tur miembro di Parlamento por haci nan trabou na un forma eficiente, Pueblo a crea fondo pa e Miembronan di Parlamento por haya asistencia den cierto ramonan cu ta necesario.
Pasobra un persona a haya un titulo universitario riba tereno financiero e ta mas cu e representante directo di comercio cu a lanta y crea su negoshi cu cansancia y perseveransa pa no papia mes di amor pa su patria den temponan dificil?
Kico ta pasa cu tur otro sector di comunidad cu ta necesario pa e pais por funciona?
Nos sistema politico ta haci cu den Parlamento tin e representacion directo di Pueblo, eligi den eleccion y representando henter un Pueblo y vigilando si gobernacion ta actua na favor di Pueblo.
E Gobierno, cu ta e grupo cu mester hiba e maneho directo di e pais na nomber di Pueblo pues na nomber di Parlamento, mester ta experto riba su tereno, manera actualmente por nota cu expertonan den nan ramo den Gobernacion.
Parlamento di Aruba no por bira centro di discriminacion pa personanan den cierto ramonan solamente of cu poder financiero pa habri nan boca.
Ta hustamente pa preveni e situacion aki tin Parlamento, cu ta e imagen di e totalidad di e Pueblo di Aruba, trahador y luchador, cu a percura pa awe Aruba tin su propio Parlamento.
Kende a logra e Aruba autonomo cu su propio Parlamento?
Awe mester stop cu e wega pa haci como sifuera ta burico tin den Parlamento pasobra personanan cu diploma di “marca”kier bira poderoso den Parlamento, cu ta refleho di Pueblo di Aruba, cu ta leu for di burico.
DIARIO ta protesta contra e actitud di humiliacion di e mayoria di Pueblo di Aruba, cu no tin un diploma di un Universidad, pero cu ta e forsa legitimo di Aruba cu no por funciona solamente cu hende cu a gradua na Universidad, pero tambe cu a gradua den tur sector sigur den e sector di amor y lealtad na Aruba y respet pa e Pueblo di Aruba, cu a lucha incansabel pa awe tur cu ta den Parlamento por yama nan mes representante di un Pueblo, cu ta gosa respet di mundo.
Ta basta cu discriminacion di supuesto sabinan sigur den un tempo cu hopi sabi a conoce caminda di prison pasobra nan tabata mucho sabi ora nan a haya oportunidad den politica!
