Atentado logro historico Wever-Croes 40 aña despues di robo di logro Betico
- Advertencia di DIARIO pa relacion Parlamento y Gobierno ta rementa
- Lucha pa puesto di 5.474 voto ta manda mayoria di 20.700 voto cas
ORANJESTAD (AAN) Na varios ocasion DIARIO, cu prueba den man, cu conocemento amplio di e sistema politico di Aruba y Reino Hulandes y sosten di expertonan a boga pa cuminsa traha riba un cambio di e sistema electoral di Aruba, cu ta mara e gobernacion di Aruba na Parlamento.
Aruba, na momento cu henter mundo ta aplaudi e logro grandi di Prome Ministro Evelyn Wever-Croes, cu a haci su entrada como lider di gobernacion di Aruba na e momento cu Aruba tabata bancarota na 2017 y economicamente paraliza pa e speranzanan falso cu e proyecto Citgo a entrega e pais.
Aruba tabata zink den problemanan, ora e prome Gobierno Evelyn Wever-Croes a asumi e liderazgo di e pais, cu na 2020 ya por a habri caminda pa futuro ora Covid-19 a bati na porta.
Pueblo di Aruba a duna un sosten historico na e bon maneho di e prome gobernacion di Evelyn Wever-Croes, cu na momentonan cu mester a tuma medidanana mas pisa den un situacion cu normalmente ta manda Gobierno cas, a logra haya mayoria di voto pa asina forma Gobierno Evelyn Wever-Croes 2, cu a logra e mayoria di 9 asiento den Parlamento y mester a uni su mes cu Raiz cu dos voto y sin participacion anterior den Gabinete Evelyn-Wever 1, cu mester a saca Aruba for di e desastre financiero cu Gobierno Mike Eman a laga atras.
E maneho estricto di Gobernacion Evelyn Wever-Croes a haya continuacion a base di e mayoria cu a forma cu e partido Raiz cu a ricibi 5.474 voto di Pueblo y a haya dos asiento den e Gobierno nobo di Evelyn Wever-Croes, cu tabata tin e encargo historico di presenta na Aruba un recuperacion financiero, cu a bira e base pa por a ehecuta e resto di e gobernacion.
Lamentablemente awe e Gobierno di Evelyn Wever-Croes, cu a bolter e cara di Aruba den Reino y ta wordo considera uno di e mihor dirigentenan di Gobierno den Reino, mester a entrega su retiro y Pueblo di Aruba dia 6 di December 2024 mester bolbe urna electoral pa asina eligi miembronan nobo pa Parlamento, cu produci miembronan nobo di un Gobierno, despues di e crisis cu a wordo causa den Parlamento di Aruba, caminda e acuerdo cu MEP cu 9 asiento den Parlamento a alcansa cu Raiz cu 2 asiento den Parlamento, a wordo kibra dor di Raiz, cu no ta honra e hecho cu Pueblo a entrega MEP 9 asiento den Parlamento contra dos asiento na Raiz.
Na 2025 lo ta 40 aña pasa, cu historia di Aruba a conoce un pagina scur den su historia democratico, na momento cu Betico Croes cu a introduci e lucha di Status Aparte na Aruba y a bira e lider cu a cumpli cu su promesa y no a hala atras, a wordo popliticamente destrui pa motibo di salida di Lago, cu tabata directamente mara na situacionnan internacional.
Na momento cu Aruba ta prepara pa recorda con partidonan politico cu a opone e lucha di Betico Croes pa Status Aparte, pa motibo di e sistema di coalicion di Aruba a logra kita e logro di Betico Croes pa nan asumi poder na e pais Aruba, cu ta logro di Betico, atrobe Aruba ta wordo asalta pa un situacion inhusto riba tereno politico.
Gobierno di Evelyn Wever-Croes a wordo manda cas pa un partido cu menos cu un cuarto di asiento cu MEP tin den Parlamento di Aruba, pasobra Raiz a kibra e convenio cu e tin cu MEP cu MEP ta dicidi kende ta e persona cu e ta pone como candidato di Presidente di Parlamento.
Pues na un momento cu mundo ta sigui aplaudi e tremendo labor di Evelyn Wever-Croes, Gobierno di Aruba ta cay pasobra partido Raiz no kier honra e seleccion di MEP.
DIARIO awe cu prueba den man, mas cu nunca ta boga pa cuminsa traha riba introduccion di un sistema cu ta separa eleccion di Parlamento for di eleccion pa Gobierno, cu mester ta basa riba mayoria cu generalmente ta haci posibel pa un partido chikito por manda e partido mayoritario cas.
Aruba atrobe ta victima di sistema politico inhusto cu ta deshaci di logro di lidernan cu logronan grandi pa nan pais manera a socede cu Betico Croes y Evelyn Wever-Croes kende como Prome Ministro cu aplauso mundial a dirigi dos periodo di gobernacion!
