Segun Ivy Swaen di ImSan:
ORANJESTAD (AAN) – Servicionan di ImSan ta sigui crece, mescos cu e demanda pa atencion medico den e region di San Nicolas y pariba di brug. Segun señora Ivy Swaen di ImSan, cada biaha mas ciudadano cu ta biba den e parti pabou di e isla ta opta pa busca asistencia medico na ImSan, na lugar di haci uzo di servicionan disponibel pabou di brug.
Swaen a indica cu algun servicio a registra un crecemento significativo entre otro e servicio di oftalmologia, unda e cantidad di operacionnan di cataract a duplica. “Conforme e necesidad ta aumenta, nos ta sigui amplia e servicionan cu nos ta brinda,” el a splica.
Segun Swaen, e crecimiento den San Nicolas y e desaroyonan economico cu ta tuma luga den e area, incluyendo e hotel y otro proyecto di inversion, tambe ta contribui directamente na e aumento di pashentnan cu ta busca asistencia na ImSan.
El a enfatisa cu ImSan ta prepara pa e desaroyonan aki y cu e institucion ta planifica continuamente a base di e demanda existente y proyecta. ImSan tin personal debidamente capacita pa sigui ofrece e calidad di servicio cu nos comunidad ta merece y busca. El a agrega cu mas desaroyo den e region por resulta den un ampliacion adicional di servicionan, incluyendo atencion di emergencia.
Pa loke ta trata servicionan specialisa, Swaen a remarca cu, siendo un hospital specialisa, den area manera oftalmologia y radio-oncologia, pashentnan cu kier haci uzo di e servicionan aki mester presenta un verwijsbrief (referencia medico) di nan docter di cas of di un specialist.
Cu e desaroyo economico, mas tanto e servicionan di prome auxilio lo ta esunnan cu lo aumenta mas. Pa loke ta trata e servicio di HOED, mas pashent lo registra a base di disponibilidad di cupo y lo mester registra na docter di cas.
Señora Swaen a conclui bisando den un entrevista cu DIARIO, cu ImSan semper tin plan y deseo pa sigui expande pa futuro segun e demanda y necesidad cu tin tanto den servicio como tambe pa expande e edificio como tambe den personal specialisa pa añadi na e calidad di servicio cu ta duna na tur pashent.
