Vilma Thijsen, Secretaria di TOPA:
ORANJESTAD (AAN) – Señora Vilma Thijsen, Secretaria di TOPA, y representante di hende muher den PSI (Public Service International), den entrevista cu DIARIO a subraya cu TOPA ta haciendo tur esfuerzo den e formacion di no solamente su delegadonan, pero tambe di e directiva.
Thijsen a señala cu bisando berdad, ultimo tempo nan ta confronta basta problema, y ora nan pidi nan dia liber pa nan delegadonan, unda cu hefenan di departamento no ta respeta e Convenio di ILO (Organizacion Internacional di Labor), cu e delegadonan tin derecho di forma nan mes, pa asina nan por bira e lidernan sindical di futuro.
E dama a comenta cu, recientemente, el a haya su mes confronta cu un hefe di trabao, cu hasta kier a sinta den stul di sindicato, y bisa cu nan ta laga nan shopsteward participa den e dianan aki di formacion, pero nan ta exigi cierto cosnan di nan.
Pues nan no ta laga nan bay sin mas, y ora bin bek nan tin cu trece relato kico ta wordo papia y esey no mester ta asina. Sindicato TOPA, Thijsen a remarca, ta pone placa, tempo, y tur cos pa trece hendenan cu tur e conocemento pa prepara su hendenan, y aworaki nan ta bay traha bek nan ta haya confrontacion cu hefenan di departamento cu ta bin cu exigencia, pa nan por acudi na e dianan di formacion. El a reitera cu esey no ta bon pasobra e hefenan ta actua contra e Convenio di ILO mes.
E dama a agrega cu TOPA tin un plan pa henter aña di adelanta, pasobra mester pidi cu diez dia laboral di anticipacion, pa e delegadonan por haya nan dianan liber. Pero aworaki nan no ta duna nan e dianan liber facilmente sino cu ta bin cu mas cos acerca manera e exigencia di presenta un relato di kico ta wordo papia durante e formacion.
