Riba e isla no tin motibo pa alerta
- Ta coregi loke Consulado Mericano a emiti
- Dengue ta un malesa endemico cu ta sporadico
ORANJESTAD (AAN): Diahuebs mainta, Departamento di Salud Publico di Aruba DVG a tuma nota di un informacion cu a worde publica pa consulado Mericano ubica na Curaçao cu ta importante pa nos coregi. E comunicado emeti ta haci un yamado di “alerta” pa outbreak di casonan di dengue den Caribe referiendo na diferente islanan manera Curaçao, Aruba, St Maarten (CAS) y tambe islanan Bonaire, St Eustatius, Saba (BES).
Como Departamento di Salud Publico di Aruba encarga cu vigilancia di malesanan infeccioso y malesanan transmiti pa sangura nos kier informa comunidad di Aruba cu e informacion aki mencionando Aruba como isla experenciando “outbreak” di dengue ta incorecto.
Na Aruba no tin brote di dengue na e momento aki. Ta importante pa ta informa cu Dengue ta un malesa endemico cu durante henter aña tin casonan sporadico y DVG ta monitorea e situacion local/ regional y mundial y ta actua mesora pa evita cu e casonan ta sigui subi. Mester remarca cu for di Juli 2023 World Health Organization a informa tur su miembronan cu Dengue por bira un problema mundial teniendo na cuenta e cambio climatologico. Door di esaki conhuntamente cu otro isla nan den Caribe Hulandes a enforza e vigilancia riba malesanan transmiti pa sangura.
Dato nan di e seccion di Epidemiologia y Investigacion ta mustra cu den e ultimo luna di 2023, DVG a ricibi 13 notificacion di Dengue di cual 5 a worde comproba, 6 a sali negativo y 2 caso a worde registra como probable. Pa aña 2024 tin 6 notificacion haci pa Dengue, di cual 2 a sali positivo, 2 negativo y di 2 caso nos ta pendiente resultado di laboratorio. Compara cu aña nan anterior, esaki no ta diferente. Indice nan di control di GKMB tambe ta mustra esaki y hospital no tin ningun caso di admision door di Dengue te cu awor aki.
Via di un boletin emiti Diahuebs mainta na Aruba, Departamento di Salud Publico kier infatisa cu Aruba no tin un “alerta” pa casonan di Dengue y den cualkier caso di un malesa cu ta un menaza pa salud publico Departamento di Salud Publico di Aruba (DVG) ta e instancia oficial pa informa comunidad debidamente.
