Segun mr. Hose Figaroa, president di FTA:
ORANJESTAD (AAN) International Labor Organization (ILO) ta mira Inteligencia Artificial (IA) como un peligro cu den futuro por tuma trabao di hopi hende, na nivel mundial. Asina mr. Hose Figaroa, Presidente di Sindicato F.T.A a duna di conoce den entrevista cu DIARIO.
Recientemente, FTA a forma parti di un conferencia cu tabata tin na Barbados, organiza door di ILO mes, riba e tema menciona. Esaki ta bay ta un di e temanan mas crucial durante e conferencia internacional di ILO tambe, na cuminzamento di Mei awo, pa e re-definicion di kico ta trabao.
“Antes e manera con bo ta describi ken ta doño di trabao y ken ta trahado, tabata relativamente facil. E dunador di trabao ta esun cu ta paga bo un salario y e trahado ta esun cu ta haci un trabao eynan.
Aworaki, door di tecnologia tin diferente tipo di trabao cu no ta cumpli cu e definicion aki. Awo tin un sistema cu ta wordo uza hopi internacionalmente, ta ‘uber’ por ehemplo. Na momento cu un hende ta un driver di uber, e ta un trahado di uber. Pakico? Pasobra e pregunta ta, con leu bo ta un ‘gezagsverhouding’ entre e empresa y e persona”, Figaroa a splica.
El a agrega cu “bay the way” e no ta un empresa ni cu ta na su pais, pero entre e entidad internacional y e persona, ken ta uza su mes auto, e mes ta schedule su oranan, unico cos cu e mester ta unda tin un hende cu ta rekeri di un transporte. “Pero e ora ey, e pregunta ta den un caso asina, ken ta e dunador di trabao? E hende mes ta su dunador di trabao? Uber ta su dunador di trabao? Na unda su dunador di trabao ta? Su doño di trabao ta den un pais leu; cual ley ta aplicable? E pais di unda su (of supuesto) dunador di trabao ta? Pues, preguntanan cu den un mundo cu ta cambiante y globaliza, cu no necesariamente bo doño di trabao ta den e pais unda bo ta traha, ta preguntanan cu mester wordo contesta. Eigenlijk, ken ta trahado tin cu wordo ahusta na e realidad di aworaki.
