Nan futuro interes y eliminacion awe mester ta central pa un pais --- *Analisis di pasonan di Gabinete Wever-Croes segun relato anual --- *Futuro di mucha ta depende di maneho financiero, economico, social
ORANJESTAD(AAN)- Kico ta un mucha, un hoben y kico ta su necesidad cu ta base pa accion di parti di Gobierno?
Ta a base di e pregunta aki, nos a analisa e loke Prome Ministro Evelyn Wever-Croes a presenta den actividadnan di Ministerio di Asuntonan General durante ultimo aña.
Ora ta papia di hubentud ta papia di parti integral di comunidad, cu mucha cu ta haci nan entrada pa duna continuacion na e accionnan cu tabata den man di e grupo di adultonan mayor cu ta yega edad di despedida.
Un comunidad no ta consisti di exponentenan separa pero di un totalidad cu ta depende di e gobierno cu Pueblo na urna electoral ta pone na poder.
Democracia mester ta e base pa e mucha cu ta nace y e ciudadano cu ta despedi di e mundo aki.
Democracia mester defende e integridad di tur ciudadano como hende den tur aspecto.
Esaki ta nifica cu pa e mucha, e hoben, ta feliz, e comunidad mester wordo dirigi na un forma cu ta conduci na felicidad.
E ambiente den cual e mucha ta nace, e trankilidad den su famia y na su pais. E cuminda cu e tin pa come y e calidad di su vivienda. E educacion cu e ta ricibi na cas y na school, e placa cu Gobierno ta gasta pa su bienestar.
Na Aruba tur garantia cu ta toca un ciudadano, ta hancra den ley. Aruba ta un estado di derecho cu ta aplicabel pa e mucha tambe.
Con Prome Ministro Wever-Croes a atende cu e leynan cu ta necesario pa e bienestar di e mucha na un forma special?
Nos ta papia aki di “un forma special” ya cu e mucha ta nace cu e derecho di defensa di su bienestar a base di ley.
E mucha ta depende pues di un Estado di Derecho cu no conoce corupcion y caminda Ley ta wordo respeta, un bon maneho financiero ta wordo hiba pa asina cuida su porvenir pa e por traha na su progreso ora e drenta proceso laboral.
E mucha mester di defensa di ley ya cu como mucha e no por defende su mes. Como mucha e por bira victima di criminalidad den su propio cas.
E institucion di un Comision Nacional pa atende cu abuso di mucha, ta loke a bira realidad na Aruba, cu a proba e ley cu ta castiga abuso di menor y a aumenta e castigo cu abuso di moralidad contra mucha, ta conoce.
Tin aspecto cu na diferente ocasion DIARIO a yega di trece dilanti y den esaki sigur ta topa cu e leynan cu ta atende cu lugarnan cu ta cuida mucha y proteccion cu mester wordo brinda na mucha y hoben.
E parti aki a wordo realisa mescos cu e Departamento cu ta vigila aplicacion di tur e leynan cu ta atende cu bienestar di mucha directamente, nan bienestar fisico y mental, asistencia cu mester wordo duna na mucha den defensa di e hoben y mucha contra abuso.
E pregunta mas grandi ta keda naturalmente si Gobierno tin placa pa paga e areglonan cu el a introduci y mester percura pa ta realidad di mucha y hoben?
Un pais sin placa of cu carga di debe no ta cumpli cu su deber enfrente hoben.
Mucha y hoben ta heredero financiero y economico di nan pais.
E mucha y hoben na Aruba a base di e problemanan financiero cu a conduci na supervision Hulandes for di 2014 bou gobierno anterior, a wordo perhudica financieramente pasobra e mes mester paga debe den futuro mientras actualmente su mayornan tin e peso di debe.
E pregunta grandi ta keda pues: Gobierno Evelyn Wever-Croes ta baha gastonan cu no ta necesario den gobierno pa atende cu e necesidad di e mucha cu e Pandemia Covid-19 a haci mas vulnerabel riba tereno financiero y economico, pero tambe pa asuntonan di salud?
E forma cu Prome Ministro Wever-Croes a atende cu e gastonan di su ministerio, ta duna prueba cu el a baha e peso presente y futuro pa famianan y asina pa e mucha y hoben.
Prome Ministro Wever-Croes mester mantene e gastonan di su ministerio na e forma cu el a baha nan, pa asina por sirbi e interes di e hoben y e mucha cu tambe tin chens di a wordo infecta cu Covid-19 sin hopi resultado te awor, pero por tin resultado den e futuro, cu e hoben y e mucha di awe ta dirigi Aruba.
