Postura di DIARIO enfrente realidad di Statuut fortifica pa tension mundial
*Avion militar Hulandes den accion na Polonia y medidanan na Gaza
* Arubiano como Hulandes mester tin bista riba su posicion internacional
ORANJESTAD(AAN)—Kico ta e posicion di Aruba y asina e Arubiano den e relacion cu ta wordo regla pa medio di Statuut?
Un pregunta cu a surgi sigur ayeramainta ora e pais mas grandi di Reino Hulandes, Hulanda, a participa na accionnan militar contra Rusia mientras cu na Medio Oriente medidanan ta wordo contempla den e confrontacionnan entre Israel y e grupo Hamas.
Pa e Arubiano e dia di ayera a habri cu informacionnan sumamente importante si tene cuenta kico Statuut ta bisa di asuntonan relaciona cu defensa y relacionnan cu otro paisnan.
Ora tuma nota di loke ta Statuut ta bisa, Defensa cu directamente ta mara na accion militar, ta wordo considera como asunto di Reino mescos cu e relacionnan cu otro paisnan.
Segun e base di Statuut, paisnan den Reino ta atende nan propio asuntonan pero hunto ta maneha loke ta cay bou Asuntonan di Reino, manera nacionalidad, representacion cu exterior y defensa.
Pues ayera ora Hulanda a drenta den accion militar como miembro di NAVO, lo por a spera cu tur pais den Reino lo a wordo debidamente informa pa asina nan na nan turno informa e ciudadanonan Hulandes na nan pais.
Ayera a habri cu un accion militar na cual Hulanda a participa como pais Europeo den NATO, pero cu e defensa militar cu ta di Reino sin cu e Arubiano a wordo oficialmente informa pa medio di su Gobierno y su Parlamento di e sucesonan.
Hulanda a actua a base di su participacion den Union Europeo pero e ekipo militar incluso militarnan mes, segun Statuut ta parti di e ekipo di defensa di Reino Hulandes cu ta encarga cu defensa di henter Reino, cu mester ta na haltura di loke ta pasa.
Ora papia di sistemanan organisatorio di un estado, sea cu nan ta Reino of Republica, democracia ta pone e poblacion central, sigur den Reino Hulandes cu ta un sistema di Monarquia Constitucional, den cual constitucion y e cuadro di ley, ta decisivo.
Na momento cu Pueblo di Hulanda como parti di Reino a wordo informa di intervencion militar cu ekipo y personal militar na Polonia contra dronenan Ruso, Pueblo di Aruba tambe mester a wordo debidamente informa como parti di Reino Hulandes na cual e militarnan y ekipo ta pertenece.
Ta bay mas leu den e asunto aki. E Arubiano ta un ciudadano Hulandes pa medio di su pasaporte. Na momento di un intervencion militar cu ekipo y personal di Reino, e Arubiano tambe ta wordo compromete y hasta por ta forma parti di e tropanan militar cu ta wordo utilisa.
Igualdad entre tur pais den Reino ta loke Statuut ta establece y asina ta deshaci di cualkier discrepancia entre balor di partinan den Reino y di e ciudadanonan Hulandes na e diferente paisnan.
E resultado di e accion di ayera mester wordo bon splica na e Arubiano mescos cu posicion cu Gobierno Hulandes ta tuma ariba nivel diplomatico internacional manera na Medio Oriente den e confrontacionnan cu ta tuma lugar na Gaza.
Aruba como partner igual den Reino y e Arubiano como ciudadano Hulandes mester wordo bon informa di tur medidanan cu ta relaciona riba terenonan di Defensa y cu otro paisnan, ya cu e Arubiano, portador di e pasaporte Hulandes, ta wordo directamente involucra den desaroyonan cu ta den man di Reino.
Aruba ariba su mes no por dicidi cu e ta parti di un accion militar ni diplomatico contra otro pais.
Hulanda a base di Statuut mester informa Aruba debidamente ora como pais e ta parti di operativanan cu resultado pa e posicion di Aruba y e Arubiano den e orden legal cu tin Statuut como base.
DIARIO a adverti na varios ocasion cu e alma di Statuut ta bini na disputa den situacionnan relaciona cu e participacion di Hulanda den Union Europeo, cu ta reconoce e ciudadano Arubano como ciudadano Hulandes, cu portador di un pasaporte cu ta duna e Arubiano derechonan den Union Europeo.
Ayera na momento cu avionnan y personal militar di e personalidad Huridico internacional Reino Hulandes a participa na accionnan na Polonia pa destrui dronenan Ruso, e Arubiano tambe segun Statuut mester tabata bon informa segun ciudadano Hulandes.
E participacion di Hulanda na loke ta pasa na Ukraina a base di e hecho cu Hulanda ta miembro di NATO, tambe mester wordo mira den e luz di Reino Hulandes y Statuut cu ta regla tambe e medidanan cu ta wordo tuma riba tereno di diplomacia cu por afecta e Arubiano.
Acuerdonan internacional ta wordo cera dor di Reino Hulandes, pero ta e gobiernonan di e diferente paisnan mester dicidi Pa nan realisacion y introduccion na e diferente paisnan.
Na mes momento ta keda un hecho cu Reino ta encarga cu relacionnan internacional cu ta wordo hiba dor di Reino.
Den e cuadro aki mester tuma nota por ehempel di decisionnan Hulandes relaciona cu e situacion na Medio Oriente y sigur na Gaza, caminda por tin medida na caminda a base di decisionnan di Union Europeo.
Siendo Reino Hulandes encarga cu asuntonan diplomatico, atrobe ta topa cu preguntanan tocante resultadonan pa e Arubiano a base di Statuut.
Informantenan clave a mustra DIARIO, cu situacion mundial mester ricibi mucho mas atencion na Aruba sigur si tene na consideracion e realidad di Statuut, cu ta entrega asuntonan militar y relacionnan internacional na Gobierno di Reino, cu ta basicamente Gobierno Hulandes!
