ORANJESTAD (AAN): -- Tocante e caso di su yiu Jadah, Minister di Husticia Rocco Tjon a comenta den Parlamento,
dirigiendo su mes na Presidente di Staten mr. Edgard Vrolijk, cu dia 28 di Februari di 2007, su yiu Jadah a nace.
Y for di 2007 pa 2010 e mester a bringa semper pa su derecho di wak su yiu, y tur caso el a gana.
Tjon a splica cu dia 6 di Februari 2010 ta e ultimo dia cu el a papia cu su yiu. El a subraya cu e falsedad cu a wordo lanta contra su persona a wordo entrega, pasobra dia 28 di Februari 2010 lo a haya un samenregeling y a base di e mentira aki e mama no por a stop esaki pero e mama no kier a entrega keho.
Seguidamente, e mandatario a lesa na Hulandes, e declaracion di Robert Candelaria:
“Boso kier wak e inzage? Wel, awo mi ta pone e declaracion di Robert Candelaria, ex-comisario di KPA y miembro di AVP, disponible, unda el a declara cu e hoofd officier a señala cu e mama no kier pa un keho bin dilanti, pero cu e unico meta cu e mama tin ta pa Tjon, nunca mas, tin contacto cu su yiu”, e Dignatario a menciona cu e mama a bay den exterior cu Jadah, pa alehe for di dje.
Minister Tjon a pone e declaracion di señor Candelaria na disposicion di e parlamentarionan, bao discrecion, pa percura pa no saca potret, pasobra tin hopi informacion hopi sensitivo y su yiu y su mama e si ta respeta, apesar di tur cos cu el a haci contra dje.
Minister Tjon a agrega cu el a haya pregunta si e caso aki a wordo investiga awo, locual no ta e caso door cu den Jeugd en zedenpolitie el a wordo investiga mas pisa.
Tambe nan a saca un carta cu a bay pa ex-minister di Husticia Arthur Dowers, pa Prome Minister Mike Eman, y pa señora Michelle Hooyboer, ex-minister di Asunto Social, unda cu detayadamente, tur cos a wordo splica, door di e investigacionnan cu a wordo haci tanto na Aruba como na Hulanda. E mandatario a splica cu su caso a wordo scrutina mas, pasobra e tempo ey e tabata hefe di Jeugd- en Zedenpolitie, y e mama tabata traha den Ministerio Publico.
Tjon a señala cu e caso aki no a stop eynan, pasobra e investigacion realiza riba su mes insistencia, y manera por lesa den e declaracion di señor Robert Candelaria, locual a conduci na e decision aki, ta cu no tabata tin prueba di nada.
Minister Tjon a agrega cu e decision aki a wordo apela, pasobra manera ta conoci un bez cu Ministerio Publico suspende e caso, a base di articulo 15 por apela e caso, y tres huez a dicidi cu no tin nada. Minister Tjon a relata cu despues di esaki el kier a entama un Caso Sumario pero esaki a wordo nenga. El a bisa cu na dado momento e haya su mes den e escogencia si ta scoge pa su mes of laga esaki. Si lague keda forma parti di un debate entre e mama y e tata of lague te eynan, pasobra ora e mucha bira grandi e mes por busca drechi. E mandatario a expresa tambe cu den bida bo mester sigui y su bida tambe a sigui.
Esaki ta un resumen di e declaracion di Minister Rocco Tjon, titular di Husticia y Asunto Social, relaciona cu e caso di su yiu, contestando preguntanan haci door di algun parlamentario.
