ORANJESTAD (AAN): Diamars atardi, Fraccion AVP a emiti un boletin y un declaracion oficial.
AVP a bisa cu riba Diamars nan a tuma nota di e sentencia pronuncia den e caso Avestruz y cu ta involucra Sr. Benny Sevinger.
“Nos ta reconoce cu Aruba ta un Estado di Derecho, unda e sistema hudicial tin su propio proceso independiente y cu e sistema mester haya espacio pa haci su trabou. Den e contexto aki, fraccion AVP kier expresa nan sincero empatia y apoyo na nan colega, parlamentario Stephany Sevinger, y na tur su famia durante e periodo dificil aki. Nos ta respeta su privacidad y dignidad mientras nan ta procesa e situacion, y ta spera otronan haci mescos.”
“Fraccion AVP ta reafirma su compromiso cu transparencia, integridad y bon gobernacion. Na mes tempo, nos ta mira cu interes cu e autoridadnan hudicial continua y acelera e investigacion y tratamento di e diferente casonan di presunto corupcion cu ainda ta pendiente, pa asina fortalece confianza di nos pueblo den e Estado di Derecho.”
