Presidente di Sindicato FTA ta reitera
- Scarcedad di trahador cu tin ta un caso urgente
- Tin di yena entre 2 mil pa 3 mil cupo di trabao local
ORANJESTAD (AAN) Den entrevista cu Hose Figaroa, Presidente di e Federacion di Trahadornan di Aruba (FTA), el a menciona cu normalmente nan tin dos of tres congreso pa aña, pero e aña aki nan ta bay tin tres congreso.
Un di e congresonan aki ta bay ta esun statutario, cu lo tuma lugar na September venidero, unda lo tin eleccion pa e directiva nobo di FTA. Pero na tur cuminzamento di aña FTA tin un Congreso den cual nan ta duna charla con pa habri e Congreso, pero tambe con e situacion financiero di FTA ta, tambe di formacion, negociacion, pa duna e Congreso idea di con e cosnan ta cana y pa tuma cierto decisionnan.
Awo nan tin riba agenda un par di ahuste cu tin den e reglamento di FTA cu nan mester bay pasa y e ta wordo ratifica e ora ey, door di e Congreso.
“Pues, nos ta purba atene nos mes na e exigencianan di e statutonan, y cierto decisionnan nos a pidi e Congreso pa ratifica”, Hose Figaroa a comenta. E Congreso aki, en principio, ta pa duna informacion interno, pero pafo tambe tin situacionnan cu ya ta conoci caba, y un di e situacionnan grandi cu nos ta sinta cu ne awo ta scarcedad di trahado”, Figaroa a señala.
El comenta cu FTA a sinta cu stakeholders. El a splica cu nan a reuni na diferente momento, no solamente cu gobierno, pero tambe cu AHATA, pa purba di yega na e miho forma pa yena bashi cu tin aworaki riba e mercado laboral, y nan enfoke ta pa pone mas tanto hende cu ta na Aruba caba na trabao, prome cu bay habri pa personanan di afo bin traha, locual ta bay ta inevitable.
“Nos ta papiando cu entre dos pa tres mil cupo di trabao ta practicamente imposible, pa haya for di bo mercado local. Esey sin tene cuenta cu e cantidad di hendenan cu ta bay baha cu pensioen, e proximo dos pa tres añanan”, Hose Figaroa a bisa y reitera cu mester “take care” prome di loke tin localmente. “Si tin indocumenta haci nan legal, pasobra pa cada un di e personanan aki cu por ubica den e mercado local, ta un persona menos cu tin cu importa, y ta un peso menos pa nos infrastructura, pa nos sistema di educacion, y nos sistema di AZV por ehemplo”, Hose Figaroa, presidente di FTA a remarca.
Por a mira ultimo lunanan, ta varios ‘Job Fair’ di negoshinan local a wordo organisa. Empresanan local cu tin mester di trahador, y no por haya. Debi na esaki, servicio na algun negoshi ta birando tiki atrasa y esaki pues ta algo di compronde.
