Dr. Monica Nuboer-Gonzalez:
- No djis docter di cas y specialista den tur rama di salud
- Esaki ta un reto enorme cu Aruba tin
ORANJESTAD (AAN) – Matutino DIARIO a entrevista Dr. Monica Nuboer-Gonzalez, Coordinador Medico di Instituto Medico San Nicolas “ImSan”, tocante e falta cu tin di docternan di cas.
“Di un tempo atras caba, nos a haya scarcedad di docternan di cas na HOED na ImSan; dos docter a kita y un docter pa razonnan di salud no por a traha. Anto, ta hopi dificil pa bo haya hende pa traha, pero asina mes nos a logra aworaki. A partir di 1 di Augustus docter Pulido ta trahando cerca nos”, docter Nuboer-Gonzalez a duna di conoce.
El a agrega cu pa october tambe tin un docter cu lo cuminza traha tambe na HOED, y nan ta ocupa cu otro docter di cas, cu manera nan keda cla cu e onderhandeling procedure, e por cuminza traha tambe.
“E reto ta hopi grandi actualmente, pa haya personal medico. Antes, hopi facil nan tabata haya di region pero aworaki e costo di bida a subi hopi, salarionan no a subi mesun hopi cu costo di bida, anto e ora ey nos ta haya cu e profesionalnan no kier bin Aruba. Anto, e ta un reto grandisimo, no solamente pa docternan di cas pero pa otro tipo di specialismo tambe, no docter so pero pa tur hende cu ta traha den sector salud”, Dr. Nuboer-Gonzalez a señala.
Den otro angulo di informacion, docter Nuboer a splica cu HOED a crece, nan a tuma tambe basta praktijks, y ademas, hopi hende kier a traha na ImSan.
“Pero, desafortunadamente, nos ta hayando contratempo, pero manera mi ta bisa, mi ta satisfecho cu nos ta poco, poco, logrando yega na un solucion pa e tekort grandi aki”, docter Monica Nuboer-Gonzalez a señala.
El a mustra contento si, cu afortunadamente, introduccion di AruBIG a haci posibel cu hendenan cu ta studia den e region, por traha na Aruba, y por specializa.
“Aworaki nos ta ocupa specializando tres docter AruBIG pero toch tin otro specialidadnan unda tin tekort” docter Nuboer-Gonzalez a conclui.
