No por crea crisis awor pa sconde scandal di berguensa averstrus
- Pa “orguyosamente” paga un debe mester keda sin come pan
- Causante di hamber planifica awor kier lucha contra hamber
ORANJESTAD (AAN)- For di momento cu un di e escandalonan mas grandi cu Aruba a yega di conoce a rementa, ya e plumanan di Avestrus a cuminsa bula y a adverti cu wega politico tabata na caminda pa sconde e berguensa di un Miembro activo di Parlamento condena na prison pa corupcion.
Mientras Mike Eman tabata splica Pueblo di Aruba cu su partido cu dos pia ta trapa riba sentencia di Huez y ta exigi Pueblo di Aruba biba cu un persona condena pa crimen den persona di Benny den Parlamento, Mike a anuncia kico lo a pasa awe.
DIARIO, cu conoce wega politico y na tanto forma a splica Aruba con hipocresia politico a destrui Aruba, a keda pendiente for di momento cu Mike a regla pa Benny keda den Parlamento y a bisa cu ora a yega pa papia di hamber na Aruba.
Awe Mike mester scapa su cara y su partido enfrente Aruba, cu a wordo presenta cu uno di e scandalnan mas grandi cu a bira conoci.
Cuanto hende realmente tabata envolvi den scandalnan cu a keda registra anteriormente durante presencia di Mike Eman paden of mara na rabo di gobernacion di Aruba, no ta conoci.
Pero sorpresa a presenta ora den e caso Avestrus e bom a rementa den seno di AVP cu no a disculpa su mes enfrente Pueblo pa Benny Sevinger, cu AVP a comberti den politico y a haci uno di su politiconan mas fuerte despues di Mike Eman.
Propiedad di Pueblo tabata negoshi durante di Mike Eman manera dos sentencia ta confirma.
Pasobra tanto otorgamento di tereno como otorgamento di permiso ta realmente decision mara na propiedad di Pueblo cu tereno, balor di tereno, permiso cu ta produci placa pa lachi di Gobierno ta.
Pa tapa solo cu un dede awor Mike ta bay papia di hamber di e Pueblo di Aruba cu ta a bira victima di prijsnan halto no solamente pa motibo di Covid-19, Guera na Ukraine y prijs di gasolin.
Loke a haci bida mas pisa ainda na Aruba, ta e peso di belasting, cu a subi pasobra mester a cubri e resultado di abuso cu Mike Eman a comete cu placa di Aruba cu asistencia directo di Benny Sevinger, cu entre otro tabata den su compania ora tabata bay busca voto den bario y tabata adapta e gastonan di Bo Aruba di acuerdo cu “loke a scucha den bario”.
Esaki no ta loke DIARIO a inventa, pero loke ta bini dilanti den e rapport di Algemene Rekenkamer Aruba cu a condena e maneho di Mike Eman cu uso di placa cu no a wordo responsabilisa di antemano pero cu despues, cu awe, Pueblo di Aruba mester paga hunto cu e debe nacional.
For di 2017 ora el a perde eleccion hende no a mira Mike cu a bati retirada despues di e debe nacional cu a keda na garganta di e hende cu hamber na Aruba.
Pero ora medidanan a wordo tuma y ora situacion mundial a haci posibel, Mike Eman a bolbe den publicidad pa e bolbe busca voto.
Cu despues di e caso Avestruz, politica pisa lo a wordo hunga, tabata algo cu por a spera. Pero cu awe Mike Eman, cu a lucha pa Benny no bandona Parlamento ni como acusado ni como hende condena dor di Huez pa corupcion, kier crea furia pa asina e por haya voto y sigui Aruba den debe.
Kico ta crea miseria di Pueblo? E placa di belasting riba tur producto cu belasting ta haci mas caro y cu Pueblo mester paga.
Ta e debe orguyoso di Mike Eman pa haya voto di Pueblo, ta motibo cu awe belasting mester crea fondo pa cubri e debe nacional, e debe di PPS, e debe di dushi bida politico.
Awe palabra a caba pa loke ta pasa pero por a spera. Pasobra si tin un bon descripcion di e forma cu Mike ta atende cu politica, mester uza e denominacion di cayman na boca di riu pa sigui biba di politica y no busca otro trabou pa traha y gana pan di cada dia manera tur hende cu ta paga belasting pa e peso cu Mike a crea y cu ta sink e condicionnan di bida y ta crea hamber na Aruba.
